Të martën mblidhet Grupi Parlamentar i PDK-së: A po shtohet presioni për Gjykatën Speciale?!

Nesër pritet që të mblidhet Grupi Parlamentar i Partisë Demokratike të Kosovës. Kjo do të jetë një mbledhje e rregullt, megjithatë nuk përjashtohet mundësia që në të të diskutohet edhe për themelimin e Gjykatës Speciale.

“Do të jetë mbledhje e rregullt e Grupit parlamentar. Me gjasë do të diskutohet edhe për themelimin e Gjykatës Speciale”, ka thënë ky burim për Gazetën Blic.

Sipas këtij burimi brenda PDK-së, Hashim Thaçi edhe pas mbledhjes së fundit të GP të PDK-së, në të cilën mori pjesë edhe ai, nuk ka qëndruar duarkryq. Gjatë gjithë asaj kohe ka lobuar tek deputetët për votimin e Gjykatës Speciale.

Ndërkohë, gjatë ditës së sotme, Gazeta Blic ka raportuar që PDK e ka një plan të ri sa i përket themelimit të Gjykatës Speciale.

“Sipas të gjitha gjasave pritet që gjatë kësaj jave të riprocedohet në Kuvend amendamenti kushtetues, i cili do t’i hap rrugë themelimit të Gjykatës Speciale. Me gjasë të premten do të mbahet seanca për votimin e Speciales”, ka thënë ky burim.

Gjithnjë sipas këtij burimi, sipas planit të menduar, mund të shkohet me thirrje të seancës së jashtëzakonshme nga ana e Kryeministrit.

“Nëse sot do të procedohej amendamenti kushtetues, deri të enjten do të ishte kohë shumë e gjatë, ku do të shtohej presioni në maksimum ndaj deputetëve dhe kësisoj do të vështirësohej edhe më shumë kalimi i Gjykatës Speciale”, ka thënë ky burim.

Ndërkaq, mediet kanë raportuar se SHBA sot ka ftuar në takim urgjent, Hashim Thaçin e Isa Mustafën, pikërisht për shkak të Gjykatës Speciale./ Gazeta Blic/