Te Kulla e Tugjecit

Nga Demir Krasniqi

Sa herë dua me dalë n’ Gollak ,
Bukuri t’ shoh me bollak ;
Dal te Kulla në Tugjec –
I shoh fshatrat veç e veç !

Nëse jam me f’tyrë prej lindjes –
Më shkojnë sytë drejt fshatit t’ Gëmicës !
Atje shoh malin e Kishës ,
Pak ma larg malin e Kikës !…

E shoh majën e Pogllavlës ,
I shoh kodrat e Velegllavës ,
I shoh kodrat e Poliçkës ,
Të Magurës e Dazhnicës …

Po nga Kulla e Tugjecit –
Shoh katundin e Gjyrishecit ,
Zhujë , Shahiq edhe Lisockë ,
Kranidell e Desivojcë …

N’ veri shoh kodrat e Sfircës ,
Shoh luginën e Jabllanicës ,
Shoh Sijarinën , Ramabajën ,
Shoh Medvegjën , Starabajën …

Shoh Mërkojën e Gollakut ,
Shoh Tupallën , Llogorin e Markut …
Kur t’ ia kthej shpinën Medvegjës –
Shoh Kalanë e Novo Bërdës !

Kur shikoj n’ jug t’ Obërshinës –
Shoh katundin e Meshinës !
Feriqevën dhe Jallaqën –
Kodra t’ bukura , sytë më kënaqën !

Nga Tugjeci i Gollakut –
I shoh malet e Karadakut !
Shoh luginën e Gjilanit ,
Shoh shumë kodra të Orllanit …

Kur shikoj kah perëndimi –
Sytë më kënaqen nga shkëlqimi !
I shoh fshatrat e gjithë trevës ,
I shoh lugjet e Krilevës …
I shoh kodrat e Kremenatës ,
I shoh kodrat e Busavatës ,
Shoh luginën e Strezovcit ,
Shoh luginën e Hajnovcit …

Po nga Kulla e Tugjecit –
I shoh kodrat e Zajçecit ,
T’ Hajkobillës , Dabishecit ,
T’ Prapashticës e Marecit …

I shoh kodrat e Gllogovicës ,
I shoh lugjet e Kosovicës …
I shoh kodrat e Vaganeshit ,
Të Leshtarit e të Makreshit …

I shoh kodrat e Rahovicës ,
I shoh lugjet e Kallugjericës …
E shoh Hanin e Sherifit ,
I shoh kodrat e Gregjenikit …

Prej Tugjecit , n’ drejtim t’ Rugovës –
E shoh gjysmën e Kosovës !…
E shoh majën e Lubotenit –
Piramidën e këtij vendit !

Bukuritë që i ka Kosova –
Askund n’ botë nuk i shikova !
Bukuritë që i ka Gollaku –
S’ mundet kurrë t’ iu hahet haku !

Jam i lumtur dhe krenar –
Që m’ ka falë Zoti shqiptar !
Që jam biri i Gollakut –
Me derëhapur të konakut !

Gjilan, më 04.06. 2017.

Demir Krasniqi