Te Kulla e Tugjecit

Bash te Kulla e Tugjecit – Shpeshherë dal e rri prej qejfit ! T’ shoh katundet veç e veç – Sikur mazën në gjyveç !

Në Tugjec – n’ qendër Gollakut –
Dal e rri , unë, prej merakut !
T’i shoh gjithë fshatrat malore ,
Që duken si n’ shuplakë dore !

Në Gollak – n’ këtë tokë malore –
Fshihen bukuri përrallore !
Aty shoh diell e dritë ,
E shoh djepin ku jam rritë !

N’ majë të Kullës së vendlindjes ,
Si nga maja e Piramidës –
Shoh kodrinat shpat me shpat ,
Shoh luginat dhe çdo fshat !…
Shikoj jugun drejt luginës –
E shoh fshatin e Meshinës !
E shoh kodrën në Jallaçë –
Sy e zemër me t’u kënaqë !

Nga malësia e Gollakut –
Shikoj malet e Karadakut !
Shikoj borën mbi Bjeshkë t’ Sharit
Bash si plisi n’ kokë t’ shqiptarit !…
Shikoj majën e Lubotenit –
Piramidën e këtij vendit !

E shoh Grykën e Kaçanikut ,
Shoh vendlindjen e Idriz Kreshnikut !
E kthej kryet shikoj drejt lindjes –
E shoh larg fshatin e Gmicës !
Shoh Pogllavlen , Malin e Kishës ,
Shoh gjelbërimin mbi degë t’ pishës !…
E kthej kryet drejt veriut –
Dëgjoj fyellin e bariut !…

Si n’ pasqyrë shoh pjesët e Sfircës
Dhe një pjesë të Jabllanicës !…
Shoh katundet pikë për pikë –
Që nga Tepja e deri n’ Kikë !…
E shoh gurrën n’ Lak t’ Novakut ,
I shoh krushqit e bajrakut !…

E kthej kryet drejt perëndimit –
Shoh shumë fshatra t’ mallëngjimit !…
Para sysh m’ del Kremenata –
Këngët , lojërat , netët e gjata !…
Pak më larg shikoj Zajçecin ,
Hajkobillën , Dabishecin …
Shoh Marecin , Prapashticën ,
E shoh Zllashin dhe Lisicën …
Shoh Leshtarin , Rahovicën ,
Gregjenikun , Gllogovicën ,
Shoh Krilevën , Kosovicën ,
Mutivodën , Bugjenicën …
Shoh Strezocin , Vaganeshin ,
Novo Bërdën dhe Makreshin …
N’ Novobërdë , shoh te Kalaja –
Ku dikur m’ rrokte sevdaja !…

E shoh gjysmën e Kosovës ,
Bjeshkët e Nemuna tej Rugovës …
Bjeshkët e Sharrit der’ n’ Iliridë ,
Lubotenin si piramidë !…
Pasi mirë t’ kem bërë pushime –
Sërish kthehem n’ shtëpinë time !
Mendja m’ rrinë n’ Gollak te mali –
Për te , këngën kurrë s’e ndali !
Gollaku n’ mua jeton –
Kënga për te nuk pushon !
Der’ sa t’ kam frymën e fundit –
S’ më shuhet malli i katundit

Gjilan, më 04.02.2015. Demir Krasniqi