Gjilan – Gjilani dhe qytetarët e tij, të shtunën do të festojnë përvjetorin e 14-të të lirisë. Duke iu uruar të gjithëve këtë ditë të veçantë, kryetari i Komunës, Qemajl Mustafa, ka thënë se ky është momenti që të rikujtojmë rrugëtimin tonë të gjatë, të vështirë dhe plot sakrifica.
Pikërisht më 15 qershor të vitit 1999, UÇK-ja dhe NATO-ja hynë në qytetin e Gjilanit, për t`i dhënë fund përgjithmonë okupimit serb.Në këto 14 vite rrugëtim në liri, kemi arritur të ndërtojmë vendin dhe të përmirësojmë mirëqenien e qytetarëve tanë, të të gjithëve pa dallim, por ende kemi shumë punë për të bërë në zhvillimin ekonomik dhe avancimin e demokracisë thuhet në urimin e kryetarit Qemajl Mustafa.
Në punën tonë të përditshme, përherë do t`i kujtojmë e nderojmë të gjithë ata dëshmorë e martirë që ranë për ëndrrën tonë të madhe, sikurse do t`i nderojmë edhe familjet e tyre, veteranët dhe invalidët e luftës, për sakrificën madhore që bënë.
Prandaj le të festojmë me dinjitet dhe të gjithë së bashku këtë ditë. “Gëzuar ditën e lirisë”, thuhet në urimin e kryetarit të Komunës, Qemajl Mustafa, me rastin e 15-qershorit, ditës së çlirimit të Gjilanit./rajonipress/
