Të dëbuarit nga Kosova Lindore ankohen tek Bajram Gecaj

Gjilan – Të hënën drejtues të Lëvizjes Qytetare “Vatra” në përbërje: Mefail Jonuzi, Kushtrim Kadriu e Naser Xhemaili dhe Abdyrrahim Ademi, zhvilluan një takim me zv. ministrin dhe zyrtarin e ndërlidhjes për Bujanoc, Preshevë dhe Medvegjë, në Qeverinë e Kosovës z.Bajram Gecaj.

Gjatë këtij takimi përfaqësuesit e Lëvizjes Qytetare “Vatra” njoftuan zotin Gecajn për problemet me të cilat ballafaqohen banorët e dëbuar nga Kosova Lindore, me theks të veçantë banorët e dëbuar nga ato treva e që jetojnë në Republikën e Kosovës.

Përfaqësuesit e Lëvizjes Qytetare ”Vatra” kërkuan nga z. Gecaj që kërkesat e tyre dhe të qytetarëve t’i adresojë në instancat më të larta qeveritare të Kosovës. Si kërkesë e veçantë ishte hapja e zyrës për Kosove Lindore në Qeverinë e Kosovës, e cila do të merrej ekskluzivisht me problemet e këtyre banorëve dhe do të ishte një adresë për këta banorë në instancat qeveritare.

Gecaj pranoi informacionet nga “Vatra” dhe njoftoi për detyrën me të cilën merret ai në këtë rol dhe shprehu gatishmërinë për bashkëpunim dhe kooperim në këtë drejtim./rajonipress/