Tare: Kombëtarja, më e bashkuar se në kohën time

Tiranë – Igli Tare flet gjithnjë e më rrallë për Kombëtaren shqiptare, por gjithsesi thotë se ndjek me vëmendje zhvillimet në kampin kuqezi.

Ish-kapiteni i Shqipërisë, sot drejtor sportiv i Lazios, ka folur në superlativ për kuqezinjtë, duke vënë në dukje se grupi është arma më e fortë, individualitetet që bëjnë diferencën janë të pakta.

“Unë mendoj se trajneri Gianni de Biasi mund të bëjë gjëra të mira në Kombëtaren shqiptare. Mendoj se pika më e fortë e skuadrës janë grupi dhe uniteti. Në këtë aspekt mendoj se Kombëtarja është edhe më e fortë se në kohën time. Më pëlqen fakti që edhe pse nuk ka shumë lojtarë të nivelit të lartë, ata që janë, kur hyjnë në fushë japin gjithçka. De Biasi ka një skuadër të mirë në dispozicion dhe po përpiqet që të ndërtojë diçka për të ardhmen, por duhet kohë dhe mendoj se nuk ka shumë kohë. E them këtë, sepse shqiptarët mezi presin që skuadra e tyre përfaqësuese të mund të kualifikohet në një garë të rëndësishme. Gjithsesi, unë mendoj se për të arritur në nivele të tilla duhen kohë dhe durim, sepse ndryshe është e pamundur”, ka thënë Tare, përcjellin mediat shqiptare të martën.