Nga Adrian Çollaku – Partia Demokratike e Kosovës këmbëngul edhe më tutje se nuk do ta ndërrojë partnerin e koalicionit qeverisës, Aleancën Kosova e Re të Behgjet Pacollit. Madje, pavarësisht se koalicioni aktual tashmë nuk i ka numrat e mjaftueshëm për të udhëhequr me ekzekutivin.
Zëvendëskryeministri Hajredin Kuçi të mërkurën, pas mbledhjes së ekzekutivit kosovar, tha se koalicioni aktual PDK- AKR do të funksionojë deri në mbajtjen e zgjedhjeve të reja.
Ndërkohë, pas Konventës së PDK-së, gjegjësisht pas distancimit të Jakup Krasniqit e Hydajet Hysenit dhe mungesës së Fatmir Limajt, koalicioni ka vetëm 56 deputetë, që sipas një matematike të thjeshtë, ky koalicion nuk i ka numrat dhe e ka vështirë i të funksionojë.
Megjithatë, zyrtarët e PDK-së duket se po dinë ta luajnë lojën politike shumë mirë.
Edhe pse Qeveria gjendet “buzë të greminës”, në mungesë të numrave, zyrtarët e saj me shumë elegancë dhe mjeshtri presionin po e bartin diku tjetër- te drejtuesit e Aleancës për Ardhmërinë e Kosovës. Ata në një formë a tjetër po ia bëjnë me dije AAK-së se nuk e kanë shumë për ngut ndërrimin e partnerit të koalicionit dhe po testojnë nëse partia e Ramush Haradinajt është e gatshme që të lëshojë pe në kërkesën e tyre të kamotshme- postin e kryeministrit.
Pas këtyre deklaratave të zyrtarëve të PDK-së, drejtuesve të AAK-së u mbetet që ta thonë fjalën e tyre dhe të bëhen shumë më seriozë. Të jenë të prerë në qëndrimet e tyre. Sidomos tani që pozicioni i tyre politik është shumë i favorshëm. “Tkurrja” e numrit të deputetëve të koalicionit qeverisës, ia ka dhënë AAK-së mundësinë që tërë situatën ta ketë në dorë. Madje, edhe rrëzimin eventual të kësaj qeverisjeje.
Megjithatë, duket se jo vetëm AAK-ja, por as Lidhja Demokratike e Kosovës, si partia më e madhe opozitare në vend, nuk janë ende të gatshme që të shkojnë në zgjedhje të reja. Lëvizja Vetëvendosje, në anën tjetër, e vetme pa mbështetjen tjetër të opozitës nuk po mund të bëjë asgjë.
Loja politike e PDK-së me çështjen e koalicionit, gjithashtu po arrin që të lërë nën hije shumë çështje të ndjeshme për vendin. Një prej tyre, edhe Fondi për Veriun, i cili fond nuk do mend se do t’i japë autonomi asaj pjese të vendit. Krijimi i një fondi të tillë, i cili të gjitha mjetet e grumbulluara do t’ua dedikojë serbëve, legalizon në një formë a tjetër autonominë për serbët e veriut, pavarësisht deklaratave të zyrtarëve të Qeverisë së Kosovës, se kjo është diçka madje shumë pozitive për vendin.
Opozita, përjashto lëvizjen Vetëvendosje, është shumë e heshtur rreth kësaj çështjeje. Madje, partia e Ramush Haradinajt, në dorën e së cilës sot është edhe e tërë qeverisja e vendit, e vlerëson si shumë të suksesshëm arritjen e marrëveshjes në Bruksel për krijimin e këtij Fondi për veriun e vendit.
Nëse AAK-ja dhe LDK-ja nuk janë më të qarta në qëndrimet dhe në objektivat e tyre politike, PDK-ja do të vazhdojë mënyrën e saj të qeverisjes edhe për shumë kohë. E papenguar nga askush. Kur s’ka kush, i qoftë për hair. Me opozitë të këtillë, pse jo, do të kërkojë edhe mandatin tjetër.
