Tahiri: Vucici duhet të ndryshojë mendësinë e vjetër politike

Zëvendëskryeministrja e Kosovës, njëherësh udhëheqëse e dialogut teknik me Serbinë në Bruksel, ka thënë se pret që Serbia të ndryshojë në raport me Kosovën.

“Është në interesin e Serbisë që sa më shpejtë ta njoh pavarësinë e Kosovës, sepse kjo është një prej kushteve kryesore që Serbia të ketë një rrugë sa më të qartë evropiane”, ka thënë Tahiri për Epoka e Re.

Ajo është shprehur se kryeministri i ri i Serbisë , Aleksandar Vucic, duhet të ndryshojë mendësinë e vjetër politike nëse vërtet dëshiron që Serbia të ecë më përpara Evropës.

Tahiri, e cila gjatë dialogut në Bruksel ka pasur rastin të dialogojë edhe me Ivica Dacicin dhe Aleksandar Vucicin, thotë se për nga mendësia politike deri tash ata nuk janë dalluar, kanë qenë të njëjtë në kuptimin e nacionalizmit.

Ajo ka thënë se zgjedhjet e ardhshme parlamentare në Kosovë dhe ato të Bashkimit Evropian në vjeshtë do të ndikojnë të mos ketë tema të reja në dialog gjatë kësaj periudhe. /Telegrafi/