Kryetari i Grupit Parlamentar i Partisë Demokratike të Kosovës, Abelard Tahiri, ka reaguar pas publikimit të një hulumtimi në mediat sllovene ku pretendohet për një skandal të ambasadorit të Kosovës në Kroaci, Martin Berishaj.
Përmes një postimi në Facebook, Tahiri ka thënë se përmasat e këtij rasti të cilin e ka quajtur skandal, dërgojnë në një drejtim – zyrën e Kryeministrit Albin Kurti.
“Përmasat e skandalit të Ambasadorit Martin Berishaj me mafinë energjetike, tashmë kanë marrë rrugë dhe po shkojnë në një drejtim të vetëm – zyrën e Kryeministrit Albin Kurti. Përkundër se ky skandal, tash nuk është më vetëm çështje përgjegjësie juridike e penale por edhe degradim i shtetit të Kosovës, Martin Berishaj vazhdon të shërbej si ambasador”, ka shkruar ai.
Tahiri tutje është shprehur se shihet qartë se qëndrimin e “padinjitetshëm” në pozitën e ambasadorit, Berishajt ia siguron miku i tij, Albin Kurti.
“Është e qartë se këtë qëndrim të padinjitetshëm në pozitë, ia siguron miku i tij Albin Kurti, emëruesi i përbashkët i miqësisë të së cilëve është GEN-i dhe mafia energjetike e Ballkanit, në kurriz të taksapaguesve të Kosovës”, ka përfunduar ai. /Telegrafi/
