Tahiri: Nuk jemi në zor për karriga, roli jonë është konstruktiv ndaj Qeverisë

Shefi i Grupir Parlamentar të PDK-së, Abelard Tahiri, ka thënë se partia e tij po luan rol konstruktiv si opozitë dhe për ta më i rëndësishëm është progresi shtetëror se sa siç i ka quajtur ai “cirkuset” në Kuvendin e Kosovës.

Tahiri tha se për PDK-në nuk është e rëndësishme karriga, por i kanë dhënë kohë Qeverisë një vit që të përmbush agjendat e saj, por që sipas tij, Qeveria nuk ka bërë asgjë për të përmirësuar mirëqenien e qytetarëve transmeton Zeri.info.

“I rëndësishëm është progresi i shtetit tonë, nuk jemi në zor për karriga, ne si parti opozitare jemi duke bërë pikërisht atë që duhet i kemi dhënë mundësi Qeverisë një vit që të zhvilloj agjendën e saj, por nuk kemi parë sukses. Më shumë jemi për të ndihmuar edhe në kohën kur ballafaqohemi me kriza se sa të shkaktojmë ndasi dhe të shfrytëzojmë fatkeqësi e tjetri”, tha ai në konferencën për media pas Mbledhjes së Kryesisë së Kuvendit.

Ai shtoi se “Konstruktiviteti për agjenda shtetërore është jashtëzakonisht i rëndësishëm”. /Zëri