Tahiri: Në mbledhjen e ardhshme të qeverive Kosovë-Shqipëri të diskutohet për shqiptarët e Luginës

Qeveria e Kosovës, në mbledhjen e sotme ka diskutuar lidhur me përgatitjet për mbledhjen e përbashkët ndërmjet qeverisë së Kosovës dhe asaj të Shqipërisë që do të mbahet në fillim të muajit qershor në Prishtinë.

Sipas kryeministrit Mustafa, janë bërë disa nga përgatitjet ku tha se është dhënë një numër i madh i dokumenteve të përbashkëta që do të nënshkruhen në atë takim por sipas tij në zyre i kanë ardhur vetëm tri marrëveshje.

“Kemi pasur raporte nga Ministria e Forcës së Sigurisë së Kosovës, nga Ministria e Pushtetit Lokal, ajo e Integrimeve Evropiane, Ministrisë së Tregtisë dhe Industrisë, Ministrisë së Punës e Mirëqenies Sociale, pra çka është punuar deri më tani por duhet të kemi informatë të saktë se cilat janë ministritë e tjera që kanë memorandum të përbashkët me Qeverinë e Shqipërisë”, tha Mustafa.

Sipas tij deri ne fund të javës tjetër duhet çdo gjë të jetë e përfunduar.

Ministrja për Dialog Edita Tahiri kërkoj që në mbledhjen e përbashkët të dy qeverive të ketë një pikë për mbështetjen e shqiptarëve të Luginës së Preshevës.

“Duhet një koordinim në këtë drejtim të dy qeverive që të mos i lëmë si jetim ata shqiptarë duke ia lënë njërës apo tjetrës qeveri”, u shpreh Tahiri./arbresh.info.