Tahiri: Koalicioni PDK-LDK, në krizë

Analisti politik, Ramush Tahiri, ka vlerësuar se shtyrja e mbledhjes së Qeverisë së Kosovës për procedimin e marrëveshjes së demarkacionit me Malin e Zi, tregon një krizë të koalicionit PDK-LDK.

Tahiri në një prononcim për “Telegrafin”, ka thënë se PDK-ja është duke luajtur një lojë të pasinqertë me LDK-në. Sipas tij, nga ana e udhëheqjes së PDK-së nuk ka pasur asnjëherë distancim ndaj deputetëve të tyre të cilët e kanë përkrahur mocionin e mosbesimit ndaj Qeverisë. “Mocioni i mosbesimit ka kaluar sepse i ka marrë 42 nënshkrime, pikërisht edhe nga deputetët e PDK-së. Ndërsa nga ana e PDK-së nuk kemi pasur një distancim ndaj këtyre deputetëve që kanë vepruar kokë në vete dhe që kanë vepruar në kundërshtim me marrëveshjen që asnjë palë e koalicionit, asnjë subjekt nuk do të përkrah në të ardhmen mocionet e mosbesimit për Qeveri. Kjo konsiderohet e pandershme në këtë raport politik”, ka thënë Tahiri.