RCCOLA

Tahiri: Do t’i çojmë në Kushtetuese Ligjin për Fondin Sovran dhe shkarkimin e anëtarit të KPK-së

/ 2 minuta lexim

Shefi i Grupit Parlamentar të PDK-së, Abelard Tahiri, ka reaguar pasi të premten në seancën e Kuvendit të Kosovës është votuar Ligji për Fondin Sovran si dhe është miratuar shkarkimi i anëtarit të Këshillit Prokurorial, Agron Beka.

Tahiri përmes një postimi në rrjetin social në Facebook ka thënë se Ligjin për Fondin Sovran si dhe shkarkimin e anëtarit të KPK-së, Beka do t’i çojnë në Gjykatën Kushtetuese.

Sipas tij, me miratimin e Ligjit për Fondin Sovran cenohen parimet themelore të organizimit ekonomik të Republikës, si konkurrenca e lirë, liria ekonomike, trajtimi i barabartë i investitorëve.

“Me këtë ligj, mëtohet të krijohet një megastrukturë burokratike që dëmton buxhetin e shtetit, krijon pasiguri juridike dhe mbi të gjitha cenon vlerën kushtetuese të sundimit të ligjit, sepse në organizimin dhe funksionimin e tij, nuk do të zbatoj as ligjin bazik për ndërmarrjet publike, as ligjin e punës, as të prokurimit publik por do të qeveriset sipas tekeve të kuazi ekspertëve të shitur”, ka shkruar Tahiri.

Uji Dea

Tutje ai tha se me përmes këtij ligji mijëra punëtorë të ndërmarrjeve rrezikojnë të mbesin në rrugë, duke i zëvendësuar me militantë partiak e me familjarë të pushtetarëve.

“Prandaj, do ta dërgojmë në Gjykatën Kushtetuese, ku me argumentet juridike do të angazhohemi për ta rrëzuar edhe këtë ligj, që bazën ideologjike e ka në ekonomitë komuniste”.

Tahiri theksoi se edhe me shkarkimin e anëtarit të KPK-së, Agron Beka paraqet përpjekjen e radhës për të bllokuar këtë institucion të pavarur kushtetues, që më pas siç u shpreh ai “ta kapin dhe nënshtrojnë”.

“Edhe ky vendim përbën cenim arbitar të pavarësisë dhe punës së KPK-së, dhe si grup paralamentar, ashtu siç jemi angazhuar në raste të tjera, edhe kësaj radhe nuk do të lejojmë prishjen e parimit kushtetues të ndarjes së pushteteve duke e dërguar të njëjtin në Gjykatën Kushtetuese”, ka thënë Tahiri. /Telegrafi/