Gjilan – Kreu i Kamenicës Shaip Surdulli duke komentuar kritikat dhe akuzat e OJQ “Fortesa” tha për rajonipress se kjo OJQ është jo profesionale dhe nuk ka kapacitete për të vlerësuar punën e KK-së dhe të ekzekutivit të Komunës e aq më parë kur raporti i saj është tendencioz dhe jo argumentues.
Puna e ekzekutivit dhe Kuvendit Komunal në Kamenicë është kritikuar nga OJQ “Fortesa” e këtij qyteti e cila në një raport të saj për punën tre mujore të monitorimit të punës së Kuvendit Komunal dhe qeverisë lokale në Komunën e Kamenicës, ka vërejtur parregullsi si në punën e legjislativit ashtu edhe në punën e ekzekutivit komunal.
“Ekzekutivi dhe legjislativi në Komunën e Kamenicës, nuk kanë ndërmarrë veprime të nevojshme në përfshirjen e qytetarëve në procesin e vendimmarrjes, derisa kryetari i Komunës, ka qasje selektive ndaj organizatave të shoqërisë civile. Kryetari i Komunës ka ndërprerë “Takimet me qytetarë”, që i ka realizuar në të kaluarën dy herë në javë, zyra e informimit nuk ofron informacion të mjaftueshëm e me kohë për qytetarët, si dhe është vërejtur rritje e shpenzimeve të buxhetit komunal për luks” etj, është thënë në raportin monitorues të Amir Jakupit udhëheqës i kësaj organizate.
Por kreu i Kamenicës Shaip Surdulli nuk e sheh si shumë serioz raportin e Jakupit dhe të OJQ “Fortesa”.
Sipas Surdullit raporti i OJQ “Fortesa” është jo profesional dhe nuk ka kapacitete për të vlerësuar punën e Asamblesë Komunale. “Për mua ai raport edhe tani edhe më herët është tendencioz dhe nuk është i bazuar në argumente dhe në punën e mirë që kemi bërë për këtë kohë. Është tendencioz sepse monitoruesi i saj Amir Jakupi është gazetar i Radio Premierës pronar i së cilës është kryetari i Degës së AKR-së në Kamenicë, i cili mbledhjet e KK-së i përcjell në cilësinë e gazetarit dhe asgjë më shumë “ thotë Surdulli.
Surdulli thotë se asnjë konstatim i kësaj OJQ nuk qëndron sepse unë pikërisht kam qenë i hapur, komunikues dhe bashkëpunues me të gjitha grupimet politike, OJQ në Kamenicë, ku edhe i kemi ndihmuar e përkrahur, transparentë në punën tonë në të gjitha komitetet, bashkëpunues me të gjitha këshillat e fshatrave, i hapur me qytetarët etj.
Surdulli tha se pikërisht puna e tij e hapur me palët dhe me njerëzit e qytetit të Kamenicës ka ndikuar që ai edhe t`i fitojë zgjedhjet e fundit për herë të dytë.”Unë rri i relaksuar në këtë drejtim sepse Kamenica tashmë ka marrë epitetin e një qyteti stabil dhe model edhe për komunat tjera të Kosovës. Po përpiqemi çdo ditë që të ndërtojmë kapacitete profesionale dhe po bëjmë më të mirën e mundshme për të përmirësuar jetën e qytetarëve dhe mirëqenien e tyre” tha Surdulli./rajonipress/
