Superfuqia e volejbollit të Kosovës Drita për herë të pestë fiton titullin e kampionit

Volejbollistet e Dritës në tri takimet finale kanë arritur të mposhtin M-Technologie nga Prishtina me rezultate identike 3:0 duke e rikthyer titullin në mënyrë triumfale në Gjilan.

Mëkati më i madh i kësaj finale ishte mos prezenca e shikuesve për ta bërë edhe më madhështore këtë triumf spektakolar.

Në finalen e tretë vashat e Dritës edhe njëherë treguan se janë superfuqi në këtë sport në shtetin e Kosovës, kundërshtarja e tyre nga Prishtina ne ndeshjen e sotme vetëm njëherë kanë arritur të paktën ta barazojnë rezultatin në 1-1 në setin e tretë.

Në setin e parë volejbollistet e Dritës e filluan furishëm duke arritur epërsinë në 10:0, por nga vetëkënaqësia e tyre lëshojnë tempon dhe setin e përfundojnë me 25:22.

Në setin e dytë volejbollistet e Dritës edhe njëherë treguan potencialin e tyre duke arritur epërsinë më të madhe në 8:1 dhe 18:9 duke e përfunduar me rezultat 25:17.

Në setin e tretë për herë të parë mysafiret në fillim të këtij seti arritën të barazojnë rezultatin në 1:1, ndërsa epërsia më e madhe Dritës ishte 18:9 duke e përfunduar me rezultat 25:19.

Nga tri finalet e luajtura brenda gjashtë ditëve Drita nuk ka humbur asnjë set ndaj kundërshtareve të tyre nga Prishtina.

Pas kësaj finale trajneri i M-Technologie, Naser Krasniqi, deklaroi.
“Gjatë këtyre finaleve kemi pasur rivalitet të madh sportivë, ne ishim të lodhur ndërsa Drita me meritë u shpall kampione, në këtë vit ne fituam Kupën ndërsa Drita titullin”.

Trajneri i Dritës, Lorik Ilazi, pas ndeshjes ishte mjaft i emocionuar duke deklaruar.
“Është gëzim i madh, ne dëshmuam pjekuri të lartë, mysafiret i përgëzoj për lojë dhe i përgëzoj të gjitha vajzat për këtë titull duke dhënë më të mirën e tyre që në fund të korrim këtë sukses tejet të madh”.

Drita me këtë fitore në finale në historikun e saj ka shënuar titullin e pestë./rajonipress/

Shpërndaje.
© RAJONIPRESS