Sulmet në veri, Kusari-Lila: Synimi për terror nga ana e Serbisë nuk është ndalë asnjëherë, vetëm ka ndryshuar mënyra

Shefja e Grupit Parlamentar e Lëvizjes Vetëvendosje, Mimoza Kusari-Lila pas sulmeve të së martës në veri të vendit theksoi se presidenti i Serbisë, Aleksandar Vuçiq me zor tenton të mbajë gjallë një konflikt të paqenë midis qytetarëve në bazë kombësie.

Kusari-Lila në një postim në Facebook shkruan se nuk ka askush problem me qytetarët serbë në Kosovë, por siç tha ajo Vuçiq e ka problem që ata nuk punojnë të gjithë kundër shtetit të Kosovës.

Lexoni të plotë postimin:

Synimi për terror nga ana e Serbisë ndaj Kosovës nuk është ndalë asnjëherë, vetëm ka ndryshuar madhësia e ndikimit dhe mënyra e aplikimit.

Sulmet e organizuara ndaj institucioneve të Kosovës në Komunat veriore, para zgjedhjeve lokale, tregojnë se cak janë institucionet e shtetit të Kosovës dhe qytetarët serbë që duan të jetojnë në dhe me shtetin e Kosovës.

Aleksandër Vuçiq nuk e ka interes integrimin dhe avancimin e serbëve në shtetin e Kosovës. E kundërta, ai kërkon që pakica serbe këtu të jetë e ndarë dhe kundër shtetit të Kosovës. Ata duan me zor ta mbajnë gjallë një konflikt të paqenë midis qytetarëve me bazë kombësie.

Kështu besojnë se do ta mundësonin dezintegrimin e shtetit të Kosovës dhe shkatërrimin e të gjithë mekanizmave demokratik.

Por sot para nesh ne kemi qytetarët e ndershëm përballë bandave kriminale të Vuçiqit. Dhe policinë e Kosovës duke kryer detyrën e saj në mbrojtje të qytetarëve dhe institucioneve.

Nuk ka askush problem me qytetarët serbë në Kosovë. Por Vuçiqi e ka problem që ata nuk punojnë të gjithë kundër shtetit të Kosovës.

Fatkeqësisht, Serbia e Millosheviqit po funksionon ende me Vuçiqin në krye të saj. /Telegrafi/