Suksesi i Italisë pasuron fjalorin e futbollit
Kiev – Rikthimi i Përfaqësueses së Italisë në majat e futbollit, ka bërë që fjalorit të këtij sporti t’i shtohen edhe një numër i fjalëve të reja.
Italia është kualifikuar në finalen e “Euro 2012” që zhvillohet të dielën (sot) në stadiumin e Kievit. Kundërshtare e Italisë në këtë finale do të jetë Përfaqësuesja e Spanjës. Arritja e Italisë deri në finale të “Euro 2012” ka befasuar gjithë opinionin për faktin se seleksionuesi Cesare Prandelli para udhëtimit në këtë turne është përballur me telashe të shumta.
“Calcioscommesse”
Italia e nisi Evropianin nën një hije të zezë, me skandalin e kurdisjes së rezultateve në futbollin italian, të pagëzuar me emrin “Calcioscommesse”. Kjo bëri që shteti i Italisë, në veçanti skuadra përfaqësuese të përjetojë edhe një nënçmim para futbollit botëror dhe reputacioni i saj të vihet në dyshim.
Mbrojtësi Domenico Criscito u detyrua të heqte dorë nga vendi i titullarit, pasi një ditë para nisjes në “Euro 2012” u la jashtë listës. Prandelli mori një vendim të tillë, pasi dhoma e Criscitos u kontrollua nga policia, pasi lojtari ishte në mesin e të dyshuarve për kurdisje.
Ky ishte skandali i tretë që kaploi Italinë në historinë e futbollit. Mirëpo, këto skandale në të shkuarën kanë qenë sinjale të suksesit për Përfaqësuesen italiane. Pas skandalit “Totonero” në vitin 1980 dhe atij “Calciopoli” të vitit 2006, Italia pati fituar titullin e kampionit të botës.