Studentët gjilanas dhe policia njihen me punën e njëri tjetrit

Gjilan – Parlamenti Studentor i Universitetit të Gjilanit vizitoi sot Policin e Kosovës ku u njoh nga afër me punën dhe kapacitetet e këtij Institucioni respektivisht stacionit policor në Gjilan. Mehmet Zylfiu nga Parlament Studentor e ka vlerësuar të suksesshme vizitën, derisa Remzi Azemi komandant i stacionit policor në Gjilan është ndarë i kënaqur me interesimin e studentëve dhe mundësinë e bashkëpunimit mes tyre.

Në fillim Studentët u pritën shumë mirë nga Komandanti i Stacionit Policor në Gjilan zoti Remzi Azemi i cili bëri një përshkrim të përgjithshëm mbi Policinë dhe iu përgjigj pyetjeve të ndryshme nga Studentët.

Vizitën e udhëhoqi Togeri Feriz Abazi i cili i njoftoi Studentët me punën, përgjegjësitë dhe objektivat që ka aktualisht Policia e Kosovës respektivisht stacioni policor në Gjilan.

Kryetari i Parlamentit Studentor Mehmet Zylfiu falënderoi Policinë e cila pa hezitim pranoi kërkesën e studentëve për vizitë si dhe për informimin e drejtë në lidhje me punën e këtij Institucioni.

Abazi dhe Zylfiu thanë që kjo vizitë ka hapur rrugë për bashkëpunime të tjera në të ardhmen ku fokus të veçantë do t’i jepet vetëdijesimit të rinisë ku me këtë rast Kryetari Zylfiu ftoi Policinë për një ligjëratë interaktive me karakter informues me Studentët në Universitetin “Kadri Zeka”./rajonipress/