Studentët e UBT-së vizituan RTV 21

Studentët e Fakultetit të Mediave dhe Komunikimit u ndan të kënaqur me vizitën Sot mysafirë të RTV 21 ishin studentët e vitit të II-të të gazetarisë të UBT-së të udhëhequr nga koordinatorja Anisa Rada.

Më këtë rast mysafirët i priti njëri nga punëtorët më të vjetër të këtij institucioni të dalluar informativ, Esad Dujaka i cili u shpjegoi studentëve, se misioni i Rtv 21 që nga fillimi para dy dekadash ka qenë dhe vazhdon të mbetet informimi korrekt, i saktë e profesional për ngjarjet në vend e më gjërë.

Studentët treguan interesim për ecurinë profesionale të lajmit nga planifikimi e deri te realizimi dhe dalja në ekran për shikuesin e respektuar. Vizitorët e nderuar nga UBT u pritën dhe bashkëbiseduan edhe me gazetarë, redaktorë, e realizatorë të programit radio-televiziv.

Studentët-gazetarë të nesërm që do të dalin nga mësonjëtoret e Universitetit prestigjioz UBT, shprehën kënaqësinë që vizituan këtë medium informativ autoritativ dhe falenderuan stafin e tij për pritjen e ngrohtë e profesionale që iu bë atyre. Kjo vizitë është vazhdim i një bashkëpunimi të frytshëm e tradicional ndërmjet RTV 21 dhe UBT-së që vazhdon me sukses tash e ca vite.

Radiotelevizioni 21 sivjet ka shënuar 20 vjetorin e themelimit. U bën dy dekada punë të suksesshme të Radiotelevizionit 21, i cili tani numëron gjithsej 7 kanale televizive, radion dhe dy portale, me bazë njërën në Kosovë dhe tjetrën në Maqedoni. Çdo herë me misionin e informimit të drejtë, të shpejtë dhe të paanshëm, shtëpia mediale 21Media vazhdon punën suksesshëm, duke mbetur mediumi lider në tregun kosovar./21Media