Studentët e Doktoraturës në UP: Nuk e paguajmë 1000 euro semestrin

Studentët e Doktoraturës në Universitetin e Prishtinës kanë kërkuar nga Rektorati të zvogëlohet pagesa e semestrit nga 1 mijë euro në 500, ashtu siç parashihet edhe në vendimin e Kryeministrit në largim.

“Në takimin e mbajtur me studentët e Doktoratës të datës 29.10.2014 jemi dakorduar që asnjë studentë të mos paguajë semestrin e dytë në shumë prej 1000 euro. Pasi vendimi që ka ardhur me datën 28 .10.2014 është i parasyshëm për disa arsye: Nga Kryeministri e dijmë të gjithë se është bërë zbritja e pagesës se semestrit për 50% për studimet PhD. Ne kemi filluar me vonesë dhe kjo nuk është bërë për fajin tonë. Prandaj edhe nuk është e logjikshme te paguajmë shumën prej 1000 €, ku edhe në programin SEMS figuron shuma prej 500€”, thuhet në njoftimin e studentëve të doktoratës.

Nesër pritet një takim i doktorantëve të UP’së me Rektorin Ramadan Zejnullahu dhe me Ministrin e Arsimit, Ramë Buja.

Ndryshe, për dallim prej UP’së, për një semestër në Universitetin Shtetëror të Tiranës studentët paguajnë 300 euro, ndërsa, në UP 1000 euro.