Strasburgu hedh poshtë ankesat e azilkërkuesve shqiptarë në Francë

Sipas Gjykatës Evropiane të Strasburgut për të Drejtat e Njeriut, situata nuk ishte aq e rëndë sa të gjykohet si trajtim çnjerëzor ose degradues.

Gjykata Evropiane e të Drejtave të Njeriut (GJEDNJ) në një vendim të saj ka hedhur poshtë pretendimet e 17 azilkërkuesve të cilët kishin kërkuar strehim në Francë dhe ishin vendosur për disa muaj në një kamp tendash në një parking.

Strehimi i tyre aty nuk mund të konsiderohet trajtim çnjerëzor ose degradues, thuhet në vendimin e GJEDNJ , të kumtuar të enjten në Strasburg, shkruan epd.

17 të rritur dhe fëmijë, nga Shqipëria, Bosnja dhe Kosova thuhet se në vitin 2013 ishin strehuar në një kamp në Metz për disa muaj, transmeton albinfo.ch.

GJEDNJ ka pranuar se kampi ishte i mbipopulluar, se kushtet sanitare nuk ishin të kënaqshme dhe se në përgjithësi bëhej fjalë për kushte të cilat, me kalimin e kohës, mund të dëmtonin shëndetin e banorëve.

Megjithatë, provat tregojnë se situata nuk ishte aq e rëndë sa të gjykohet si trajtim çnjerëzor ose degradues. GJEDNJ gjithashtu ka vënë në dukje veprimet pozitive të ndërmarra nga autoritetet në atë kohë, si trajtimi mjekësor dhe shkollimi për fëmijët.

Refuzimi i ankesave kishte të bënte me pesë nga paditësi, përcjell albinfo.ch. Për dymbëdhjetë të tjerët, GJEDNJ e kishte mbyllur çështjen sepse ka konisideruar se ata nuk kishin më asnjë interes për procesin. Ata nuk janë më në kontakt me avokatët e tyre dhe nuk kanë lënë informacion në lidhje me disponueshmërinë e tyre.

https://www.albinfo.ch/strasburgu-hedh-poshte-ankesat-e-azilkerkuesve-shqiptare-ne-france/