Stavileci: Norma e inflacionit është rritur, e qeveria me lëmosha të vogla po mendon të zgjedh probleme të mëdha ekonomike

Zyrtari i PDK-së, Blerand Stavileci ka thënë se norma e inflacionit për muajin mars ka shënuar numër dyshifror, pra 10 për qind, e që thotë se ky është rekord i zi.

Përmes një postimi në facebook, Stavileci thotë se shtrenjtimi i madh i rrymës, ngritja e paparë e çmimeve për prodhimet elementare dhe tani kjo normë dyshifrore rekorde e inflacionit do ta godasë edhe më ashpër mirëqenien e qytetarëve të vendit tonë.

“Ndërkaq, qeveritarët edhe ashtu në deflacion vizioni e idesh për t’i tejkaluar sfidat e sotme, me lëmosha të vogla e të çastit po mendojnë se mund të zgjidhen problemet e mëdha ekonomike.

Përderisa të gjitha po përkeqësohen në kurriz të qytetarëve, ne ende s’e kemi parë asnjë zgjidhje meritore afatgjatë, përveçse lëmoshës për muajin prill, e cila i bie të jetë nga 11.1 euro për muaj deri në fund të vitit. E çka të mbulojnë më parë me këtë vlerë qytetarët e pafajshëm? Rrymën? Derivatet? Miellin? Bukën? Qumështin? Vajin?”, shkroi Stavileci.