Stano: Qëllimi i dialogut nuk është njohja, por normalizimi i raporteve mes Kosovës dhe Serbisë

Zëdhënësi i Bashkimit Evropian, Peter Stano ka thënë se qëllimi i dialgout nuk është njohja, por normalizimi i raporteve në mes të Kosovës dhe Serbisë.

Në një konferencë të rregullt për media, Stano deklaroi se objektivi i BE-së është që të arrihet marrëveshje finale gjithëpërfshirëse.

“Qëllimi i dialogut nuk është njohja, objektivi i dialogut është normalizimi i raporteve në mes të Kosovës dhe Serbisë, dhe sa i takon situatës së normalizimit të raporteve është e vendosur nga të dyja palët”, tha ai.

Stano theksoi se u takon të dy palëve të vendosin gjersa BE-ja është ndërmjetësuese e këtij dialogu.

“Ne nuk e diktojmë çfarë do të bëjnë dhe si, por po i ndihmojmë me perspektivën, maturinë evropiane dhe kompromisin evropian, por objektivi dhe mandati jonë është që të arrijnë marrëveshjen finale gjithëpërfshirëse ligjërisht të obligueshme për normalizim të raporteve”, u shpreh zëdhënësi i BE-së.

Stano po ashtu foli edhe për propozimin evropian, të cilin gjatë së hënës, e kanë pranuar Kosova dhe Serbia.

Sipas tij, ajo që u ra dakord në takim është se nuk ka nevojë për diskutime të mëtejshme për përmbajtjen, për tekstin e propozimit dhe se do të punojmë me palët për zbatimin.

“Natyrisht, ne si BE do t’i ndihmojmë ata. Ne do të vazhdojmë përpjekjet tona lehtësuese. Ata e miratuan propozimin. Ata ranë dakord që nuk nevojiten diskutime të mëtejshme rreth dokumentit dhe se mund të kalojmë në fazën tjetër”, ka thënë Stano./Telegrafi/