“Srpska” fiton edhe në Partesh

Komisioni Qendror i Zgjedhjeve mbajti konferencën e fundit lidhur me përsëritjen e raundit të dytë të Zgjedhjeve Lokale për kryetar komune në Qendrën e Votimit 3603D, në fshatin Pasjan të Komunës së Parteshit.

Kryetarja e KQZ-së, Valdete Daka, bëri të ditur se deri në mbyllje të votimit kanë votuar 68.78 për qind ose 1.304 votues nga 1.896 sa është numri i përgjithshëm i votuesve në këtë komunë.

Po ashtu, KQZ publikoi edhe rezultatet preleminare për kryetar të Komunës së Parteshit. Pjesë e këtij rezultati, përveç rezultatit të rivotimit nga dita e sotme, është edhe rezultati i votimit për raundin e dytë mbajtur më 01 dhjetor 2013 në qendrat tjera të votimit në këtë komunë.

Sipas rezultateve, Dragan Nikolic nga Iniciative Qytetare “Srpska” ka fituar 1.398 vota (52.4 për qind), ndërsa Nenad Cvetkovic nga Partia e Pavarur Liberale ka fituar 1.272 vota (47.6 për qind). /Telegrafi/