S’po shfrytëzohet MSA-ja

Institucionet kosovare kanë dështuar në përmbushjen e obligimeve që ka marrë për zbatimin e Marrëveshjes së Stabilizim-Asociimit (MSA), pavarësisht faktit që është bërë një vit nga nënshkrimi i saj me Bashkimin Evropian.

Marrëveshja për Stabilizim-Asociim, e cila kishte hyrë në fuqi në prill të këtij viti, por që ishte nënshkruar disa muaj më parë, ishte vlerësuar si hapja e rrugës për integrim të Kosovës në Evropë.

Mirëpo sipas ekspertëve të ekonomisë, Kosova është treguar e papërgatitur që të marrë pjesë në tregun e përbashkët evropian për shkak të standardeve, shkruan sot Gazeta “Zëri”.

Se zbatimi i kësaj marrëveshjeje varet tërësisht nga Kosova thonë edhe deputetët e Kuvendit të Kosovës dhe njohës të çështjeve politike.

Sipas një hulumtimi të bërë nga Grupi për Studime Juridike dhe Politike në gjashtëmujorin e parë të këtij viti, institucionet kanë arritur që vetëm 27 për qind t’i përmbushin obligimet që kanë marrë për zbatimin e MSA-së.

Pavarësisht faktit që MSA-ja vlerësohet si një ndër marrëveshjet që do të mundë t’i sillte shumë të mira vendit, sipas profesorit të ekonomisë Musa Limani, Kosova deri më tani nuk ka arritur ta shfrytëzojë këtë rast.

“Marrëveshja për Stabilizim-Asocim paraqet një hap shumë të rëndësishëm të Kosovës për anëtarësim të përhershëm në familjen e madhe- në Bashkimin Evropian, në aspektin politik. Por edhe në aspektin ekonomik ka rëndësi të madhe për arsye se vendi, i cili nënshkruan këtë marrëveshje mund të ketë beneficione në tregun e përbashkët evropian”, ka thënë Limani./zeri/