Spitali i Gjilanit rinovohet – merr pamje tjetër

Gjilan – Spitali rajonal i Gjilanit ka ndarë rreth 108 mijë euro mjete nga buxheti i Ministrisë së Shëndetësisë për të rinovuar nyjat sanitare dhe repartin e emergjencës. Në këtë projekt hynë edhe Neonatologjia dhe rregullimi i tri dhomave të lindjes në repartin e gjinekologjisë tha për rajonipress Abdylatif Latifi.

Spitali rajonal në Gjilan ka nisur të rinovohet sërish duke i dhënë një pamje krejt tjetër objektit që dikur ishte rinovuar nga donacionet ndërkombëtare. Tani me një investim prej 108 mijë eurove mjete këto të Ministrisë së Shëndetësisë është planifikuar të rinovohen nyjat sanitare dhe komplet reparti i emergjencës tha për rajonipress Abdylatif Latifi drejtor në këtë spital.

Latifi tha se këto investime po bëhen me kërkesë të shefave të reparteve të cilët vet i kanë caktuar prioritetet. Latifi tha se në kuadër të këtij investimi do të rregullohet edhe reparti i Neonatologjisë si dhe do të rregullohen tri dhoma, salla të lindjes në repartin e Gjinekologjisë.”Me këto investime serioze ne mendojmë ta modernizojmë infrastrukturën spitalore dhe tu ofrojmë kushte komode pacientëve” tha Latifi.

Sipas Latifit me investimet vetanake spitali ka pajisur me inventar, tavolina pune e kompjuter disa reparte dhe një pjesë të administratës. Ky investim ka kushtuar 9700 euro tha ai./rajonipress/