“Spektakël momental”, Krasniqi: Aplikimi për në BE, i pakoordinuar me partnerët

Kryetari i Partisë Demokratike të Kosovës, Memli Krasniqi e konsideron si një spektakël momental dhe një veprim që nuk ishte koordinuar me partnerët ndërkombëtarë, aplikimin për anëtarësimin e Kosovës në Bashkimin Evropian.

Krasniqi u shpreh se në ceremoninë e djeshme në Prishtinë, nuk ishte i pranishëm amabsadori i Bashkimit Evropian dhe kjo sipas tij, tregon një moskoordinim të krerëve të institucioneve të Kosovës dhe ndërkombëtarëve.

Ndër të tjera, Krasniqi nënvizoi se aplikimi do të marrë vlerë, vetëm nëse futet në agjendën e Këshillit Evropian.

“Para se gjithash, është një konsensus qytetar, jo vetëm politik, që Kosova duhet t’i takojë familjes evropiane dhe si Parti Demokratike e Kosovës, ne gjithmonë kemi mbështetur dhe mbështesim çdo veprim, që na përafron me arritjen e kësaj aspirate. Ajo që duhet të themi në këtë moment, është fakti që për të ndodhur një gjë e tillë, duhet të kemi një koordinim me partnerët kryesorë evropianë. Vetëm nga pamja e ceremonisë së djeshme, mbeta paksa i befasuar, me mosprezencën as të ambasadorit të BE-së në Kosovë dhe as të ndonjë zyrtari tjetër evropian, gjë që më bën të mendoj që ndoshta edhe ky veprim, është në vazhdën e veprimeve të pakoordinuara me partnerët ndërkombëtarë që krerët e institucioneve të Kosovës i kanë bërë si shprehi sidomos gjatë vitit 2022.

Në këtë kuadër, aplikimi do duhet të ishte një moment, i cili pastaj pasohet edhe nga vepra të tjera konkrete. Vlera e aplikimit do të konkretizohet vetëm në momentin kur ky do të përfshihet në agjendën e Këshillit Evropian. Pa pasur një qartësi se a do të ndodhë kjo, druaj se kemi të bëjmë me një veprim i cili, përtej spektaklit momental, nuk do të ketë një vlerë dhe do të jetë dëshpërues për qytetarët e Kosovës në të ardhmen”, theksoi ai në Euronewsal.

Shpërndaje.
© RAJONIPRESS