UBT

Spektakël dhe garë në Gjilan, përfundon me sukses turneu i karatesë “Ditët e Agimit”

/ 3 minuta lexim
Eco Higjiena

Gjilan – Në një atmosferë të ngrohtë dhe emocionuese, përfundoi me sukses turneu ndërkombëtar i karatesë “Ditët e Agimit”, i organizuar në Palestrën e Sporteve “Bashkim Selishta-Petriti” në Gjilan nga klubi i karatesë “Agim Ramadani”.

Ky manifestim sportiv e bëri të mundur mbledhjen e 43 ekipeve, të cilat në total numëruan 350 karateistë nga të gjitha anët e vendit dhe më gjerë.
Gjatë këtij turneu, pasionantët e karatesë u përfshinë në rreth 400 luftëra të ndryshme në disiplinat e Kata dhe Kumite, duke demonstruar nivelin e tyre të lartë teknik dhe shpirtin garues.

Klubet nga Gjilani, si AS, Drita, Agim Ramadani, Emperors dhe Katana, përfaqësuan me nder qytetin dhe shkëlqyen me performancën e tyre në arenën ndërkombëtare të karatesë.

Në tabelën e medaljeve, klubi KK “AS” u shqua me 6 medalje të arta, 8 të argjenda dhe 9 të bronzta, ndërsa KK “Drita” arriti të fitonte 2 medalje të arta, 2 të argjenda dhe 7 të bronzta.

Klubi “Agim Ramadani” shkëlqeu me 5 medalje të arta dhe 6 të bronzta, KK “Emperors” mblodhi 2 të arta, 2 të argjenda dhe 1 të bronzët, ndërsa KK “Katana” mori 1 të artë, 3 të argjenda dhe 3 të bronzta.

Mobi Casa

Përfundimisht, u shpërndanë gjithsej 97 medalje të arta, 80 të argjenda dhe 106 të bronzta, duke e bërë kështu këtë turne një ngjarje të jashtëzakonshme për të gjithë pjesëmarrësit dhe përkrahësit e karatesë.

Pas përfundimit të turneut, trajneri i klubit të Karates “Agim Ramadani”, Shkëlzen Balaj, shprehu emocionin dhe krenarinë e tij për suksesin e klubin dhe për rëndësinë e sportit në promovimin e vlerave të ndershme dhe garës së shëndetshme.

Ai falënderoi të gjithë pjesëmarrësit, sponzorët dhe mbështetësit për kontributin e tyre në realizimin e këtij turneu të madh.
“Jam i nderuar dhe i emocionuar që nëpërmjet sportit po nderojmë figurën e kolosit dhe heroit të kombit Agim Ramadani. Ne, si klub jemi të nderuar për pjesëmarrjen e shumë klubeve të cilat treguan performancë të jashtëzakonshme, me një disiplinë të madhe. I falënderojmë të gjithë sponsorët që na mundësuan mbajtjen e këtij turneu, e veçanërisht stafin e Federatës së Karatesë së Kosovës, të cilët dhanë një kontributë të madhë për mirëmbajtjen e garës”.

Ky sukses i dytë i radhës për turneun e karatesë “Ditët e Agimit” dëshmon qartësisht për rëndësinë dhe nivelin e lartë të këtij eventi sportiv. Performanca e shkëlqyer e karateistëve dhe klubet nga Gjilani dhe rajoni, si dhe pjesëmarrja e 43 ekipeve me 350 karateistë, tregojnë pasionin dhe përkushtimin e tyre për sportin dhe garën e shëndetshme.

Ky manifestim shpërthyes i talentit dhe aftësive në fushën e karatesë është një frymëzim për të rinjtë dhe një mbështetje e vazhdueshme për të promovuar vlerat e disiplinës dhe respektit nëpërmjet sportit. Klubi “Agim Ramadani” dhe të gjithë pjesëmarrësit e tjerë kanë sjellë një kontribut të çmuar në këtë ngjarje, duke e bërë atë një sukses të vërtetë të sportit dhe bashkëpunimit./rajonipress/