Sot kanë festë shqiptarët

Në 101 vjetorin e Ditës së Pavarësisë do të jenë së bashku krerët e shtetit presidenti Bujar Nishani, kryetari i Kuvendit, Ilir Meta dhe kryeministri Edi Rama.

Sot në orën 11:00 nisin në Vlorë festimet për 28 Nëntorin dhe tre krerët e shtetit do të marrin pjesë në ceremoninë e ngritjes së Flamurit dhe më pas në vendosjen e kurorave me lule te varri i Ismail Qemalit.

Aktivitetet do të vijojnë në teatrin “Petro Marko” ku kryeministri Rama do të ketë dhe një prononcim për mediet. Në orën 12.00 në teatrin “Petro Marko do të bëhet prezantimi i projektit “Lungo Mare” si dhe do të shpallet konkursi ndërkombëtar për projektin e vijës bregdetare të qytetit të Vlorës.

Në orën 19.00 kreu i qeverisë do të marrë pjesë në pritjen e presidentit të Republikës.

Aktivitetet janë paraprirë nga mesazhe të shumta urimi. Me rastin e 101-vjetorit të Pavarësisë, Presidenti Nishani ka marrë mesazhe urimi nga presidenti i SHBA Barack Obama. nga presidenti i Gjermanisë, Joachim Gauck, ai austriak, Heinz Fischer, i Izraelit, Shimon Peres, nga presidenti i Zvicrës, Ueli Maurer dhe presidentja e Kosovës, Atifete Jahjaga. Ndërkohë kryeministri i Kosovës, Hashim Thaçi ka uruar homologun shqiptar, Edi Rama për festën e 28 Nëntorit.

Në Shkodër, qyteti i fundit i çliruar nga pushtuesit, me rastin e 101-vjetorit të Pavarësisë janë vendosur flamuj kuq e zi. Bashkia ka zbukuruar rrugët kryesore të qytetit duke dashur të krijojë një atmosferë festive.

Ndërkohë, në datën 28 dhe 29 nëntor janë parashikuar dhe disa aktivitete kulturore në kujtim të pavarësisë së kombit dhe çlirimit të Atdheut. Kështu, vendosja e kurorave me lule tek Varrezat e Dëshmorëve, interpretimi i bandës së qytetit në rrugët kryesore dhe vizita te familjet e dëshmorëve janë disa nga eventet që priten të realizohen.

Festë edhe Kosova

Edhe në Kosovë sot festohet Dita e Shpalljes së Pavarësisë së Shqipërisë, Dita e daljes publike e UÇK-së dhe ditëlindja e Komandantit Legjendar të UÇK-së, Adem Jashari .

Për këtë ditë përfaqësues të ndryshëm të Institucioneve të Kosovës do të bëjnë homazhe në Prekaz dhe pranë varrezave të dëshmorëve në gjithë territorin e Kosovës.

Ndërkohë, Komunat në Kosovë shënojnë këtë ditë me një varg aktivitetesh kulturore.

Ndryshe, 28 nëntori është ditë e falënderimeve, megjithatë zyrtarisht nuk është shpallur si ditë pushimi.