Sonila Meço, ‘braktis’ televizionin

Tiranë – Ka vendosur t’u thotë ‘po’ pushimeve, pikërisht atëherë kur të gjithë prisnin ta shihnin më të angazhuar se kurrë në ekran. Sonila Meço, folësja dhe kryeredaktorja e lajmeve në “ABC News”, largohet nga ky televizion në këtë prag fushate, për t’u relaksuar e për të fituar kohën e humbur me vajzën, Amaris, tashmë 1 vjeçe, dhe për të vazhduar studimet e lëna përgjysmë.

Gazetarja e dashur e ekranit, në një prononcim për “Bluetooth” thotë se largimi nga ekrani në këtë moment ka qenë një zgjedhje plotësisht e saja. “E para, kisha nevojë për pak pushim. Më duhej një pauzë, sepse edhe vajzën s’e kam shijuar siç duhet, pasi u ktheva shumë shpejt në punë. E dyta, më duhet që të përfundoj doktoraturën, të cilën kam vite që e shtyj për pasojë të angazhimit intensiv në televizion”, – rrëfen Meço, e cila na zbulon sakaq se këto ditë i është rikthyer edhe auditorit të fakultetit për të dhënë mësim.

Gjatë komunikimit me ne, Meço mohon në mënyrë kategorike zërat që e përflasin si një kandidate të mundshme në zgjedhjet e sivjetshme. (BalkanWeb)