Sokol Haziri zgjidhet kryetar i ri i AAK-së në Gjilan, drejtuesit e partisë premtojnë fuqizim të Aleancës

Gjilan – Në kuadër të takimeve me degët e Aleancës për Ardhmërinë e Kosovës në Komunën e Gjilanit, morën pjesë Ardian Gjini, Besnik Tahiri, Ahmet Isufi dhe Nazim Gagica, ku u diskutua për organizimin dhe forcimin e strukturave të partisë në këtë komunë. Në Kuvendin e mbajtur me strukturat e degës, me mbështetje unanime, kryetar i ri i Aleancës në Gjilan u zgjodh Sokol Haziri.

Përfaqësuesit e AAK-së e vlerësuan Hazirin si një bashkëpunëtor të dëshmuar ndër vite, me përvojë institucionale dhe përkushtim ndaj qytetarëve, duke theksuar se riorganizimi i organeve të partisë është dëshmi e fuqizimit të Aleancës në çdo nivel.

“Bashkë do të vazhdojmë punën në teren për të jetësuar vizionin tonë në Gjilan dhe në mbarë Kosovën”, u tha gjatë takimit, duke uruar sukses për udhëheqjen e re të degës.

Nga ana tjetër, kryetari i sapozgjedhur, Sokol Haziri, deklaroi se do të angazhohet maksimalisht për rikthimin e besimit qytetar ndaj AAK-së.

“Do të punoj dhe veproj me të gjitha kapacitetet profesionale dhe kadrovike për ta kthyer besimin e AAK-së në vendin e merituar në skenën politike”, tha Sokol Haziri./rajonipress/