Sokol Haliti, në hap me Rugovën: “Fitore pa bërryla në Viti”

Viti – Në qendër të qytetit, përballë fotos gjigante të Presidentit historik Ibrahim Rugova, Sokol Haliti shfaqet i qetë, i buzëqeshur dhe i mbushur me krenari. Pas fitores së katërt radhazi në krye të Komunës së Vitisë, Haliti ecën sot krah hapave të njërit prej figurave më të mëdha të kombit, duke e lidhur punën e tij me frymën e Rugovës.

“Fotoja e Rugovës në shesh tani duket më e bukur”, shkroi ai në rrjete sociale, një fjali e shkurtër, por e mbushur me simbolikë të thellë.

Për Halitin, kjo foto nuk është vetëm një dekor i qytetit; është kujtesë, inspirim dhe respekt për njeriun që i dha Kosovës dimensionin e paqes, kulturës dhe mençurisë politike.

Fitorja e tij e radhës nuk erdhi nga fjalët e rënda, as nga bërrylat e politikës. Asnjë fyerje, asnjë gjuhë përçarëse.

Sokol Haliti e ndërtoi mandatin e katërt me punë, qetësi dhe besim të ndërsjellë me qytetarët e Vitisë. Eci derë më derë, lagje më lagje, me një angazhim që shumë e përshkruajnë si “luftarak”, por me një qasje që mbeti gjithmonë njerëzore.

Në një kohë kur politika shpesh ngatërrohet me inate e rivalitet të ashpër, Haliti triumfoi me stilin e tij të qetë, të matur dhe të ndershëm. Pikërisht kjo ia vulosi fitoren.

Viti e pa, e vlerësoi dhe e shpërbleu./rajonipress/