Skuadrat evropiane ia mësyjnë Amir Rrahmanit

Skuadrat e njohura evropiane ia kanë vënë syrin futbollistit kosovar, Amir Rrahmani. Qendërmbrojtësi e pati një sezon të shkëlqyeshëm me Dinamo Zagrebin dhe forma e tij ka bërë që t’iu bie në sy klubeve nga Franca, Belgjika e Skocia.

Amir Rrahmani është bërë objektiv i klubeve të njohura evropiane, shkruan Gazeta Express.

Futbollisti kosovar shkëlqeu në sezonin e fundit me Dinamo Zagrebin dhe u tregua mjaft stabil me Kombëtaren e Kosovës.

Prandaj, klubet evropiane kanë nisur të trokasin në dyert e Dinamo Zagrebit, i cili e mban kartonin e tij.

Sipas mediave të huaja, qendërmbrojtësin kosovar e do Standard Liege në Belgjikë, i cili e riktheu së fundmi Mërgim Vojvodën.

Mirëpo, mediat belge, respektivisht “DH.be” raporton se Rrahmanit ia ka vënë syrin edhe Celticu në Skoci.

Kapiteni i Kosovës në ndeshjen me Malin e Zi po ashtu po monitorohet edhe nga Amiensi në Francë.

Rrahmani ka kontratë me Dinamon deri në verën e vitit 2021 dhe mund të kushtojë deri në 2 milionë euro.

Mësohet se Standardi e udhëheq garën për lojtarin, përkundër interesimit të Celticut e Amiensit.

Rrahmani i ka zhvilluar 57 ndeshje me Dinamon, duke realizuar 4 gola dhe ka regjistruar tri asistime.

Ai i ka realizuar tre gola nga 19 ndeshje me Kosovën. /Gazeta Express/