Hidromorava

“Skleroza” ka prekur Lutfi Hazirin dhe të “Ri-kthyerit” në degën e LDK-së

/ 7 minuta lexim

Nga Riad Rashiti – Zhvillimet e fundit në skenën politike në Kosovë, për LDK-në po vlerësohen dekurajuese dhe vazhdim i rrugës së saj drejtë humbjes së radhës në zgjedhjet e ardhshme lokale dhe ato qendrore, të cilat zhvillime po shkaktojnë efekte të dëmshme anësore deri me paraqitjen e “sklerozës” apo siç njihet më mirë në popull sëmundja e harresës.

Dhe shenjat e para të prekjes nga “skleroza” janë paraqitur tek të “Ri-kthyerit” e LDK-së, të cilët kanë harruar pse kishin ikur nga LDK-ja, ku kohë të gjatë e kanë akuzuar rëndë e më rëndë ish-subjektin e tyre, për dështimet dhe mospunën e tyre, keqpërdorimet e shumta të cilat bëheshin në atë kohë, bllokimin e bashkëpunimit në mes Komunës dhe Institucioneve qendrore, prishjen e plotë të klimës për biznesin privat, investimet kapitale ishin shumë të ulëta edhe pse në pushtetin e LDK-së, Ministrinë e Transportit e udhëhiqte një kuadër nga LDK-ja e Gjilanit ku asgjë dhe asnjë investim nuk e kishte sjellur për komunën e tij. Të “Ri-kthyerit” në atë kohë akuzonin degën e LDK-së, dhe zv/Kryeministrin e Kosovës Lutfi Hazirin se po dëmtonte rëndë me qëllime të caktuara komunën e tij për inate të ulëta politike që ishin krijuar në mes të klaneve të LDK-së që më vonë një pjesë u nda dhe krijuan LDD-në, ku shumë probleme të ndryshme kishin mbetur të pazgjidhura deri në momentin kur erdhi “Pranvera e hershme” në kohë dimri për qytetarët e Gjilanit.

Të “Ri-kthyerit” në LDK duhet të marrin ngapak terapi dhe të menaxhojnë më mirë gjendjen e tyre pas prekjes nga “skleroza”, pasi që mund edhe më shumë ti përkeqësohet kjo gjendje, ata mund të shërohen lehtë nga kjo “prekje” e “sklerozës”, por vetëm duke i kujtuar arsyet e tyre, pse e kishin braktisur partinë e tyre LDK-në, dhe kishin krijuar një “organizëm” të ri? Tani të “Ri-kthyerit” përsëri dështuan si pasojë e mospunës së tyre, mungesës së vizionit dhe vullnetit të tyre për punë, të cilët po mundohen tani të ri-gjejnë veten në mjegullën e parakohshme e cila ka prekur kohën e fundit degën e LDK-së në Gjilan.

Gjendja është edhe më shqetësuese dhe më e përkeqësuar te Lutfi Haziri, kryetar i kësaj dege, sepse “skleroza” e ka prekur më shumë se të “Ri-kthyerit” në këtë degë, ku ai, përveç që ka harruar për veprimet e tij shumë të dëmshme për komunën e Gjilanit sa ishte në funksione të larta në institucionet qendrore, ai poashtu po harron që veprimet e tij tani po i bënë në dëm të qytetarëve të Gjilanit.

Si mund të akuzohet pa asnjë bazë pushteti aktual në komunë nga Haziri, gjersa ai në praktikë në mënyrë të drejtpërdrejtë dhe tërthorazi i bënë vet ato gjëra për të cilat ai po akuzon?.

Si mund të akuzoj një person si Haziri, se pushteti po i fut duart në xhepat e nxënësve? Përderisa, si asnjëherë më parë nuk ka pasur rend dhe disiplinë, me një transparencë të plotë rreth këtij organizimi.

Le të kujtoj pak Haziri se deri para pak javësh, kuadrat e kryesisë së degës së LDK-së në Gjilan, i kanë detyruar qytetarët, pacientët (të paguajnë jashtligjshëm) dhe të detyrohen bizneset që t`i fusin lekët e tyre të fituara me mund, në xhepat e udhëheqësve të institucioneve, si në rastin e drejtorit të spitalit regjional të Gjilanit (i cili përveç suspendimit i është ngritur edhe aktakuza për keqpërdorime), le ta thotë Haziri se për cilin anëtar të kryesisë së degës së PDK-së në Gjilan, apo ndonjë zyrtari tjetër të lartë në Gjilan i është ngritur ndonjë aktakuzë apo mund të thuhet se është duke keqpërdorur pozitat e tyre.

KKGJILAN

Ju zoti Lutfi Haziri, si aksionar me 5% (ne kemi dëshmi të pagesës në emër tuajin për blerjen e fabrikës së radiatorëve) në ndërmarrjen publikë të privatizuar (proces i dyshimtë edhe përmes gjykatave), keni kontribuar që t`i largoni disa dhjetëra punëtorë të cilët me dekada të tëra, kanë kontribuar në këtë fabrikë.

Ju zoti Haziri po harroni që Komuna e Gjilanit ka bërë punën më të madhe në rastin e KRM Higjiena, sepse përveç punës disa vjeçare për t`i nxitur investimet e jashtme, ka arritur të dëshmojë se investimi i tyre do të mbrohet dhe garantohet me çdo kusht nga institucionet dhe mekanizmat shtetëror. Ne si komunë, nuk kemi larguar nga puna askënd, por bordi i kësaj kompanie i ka suspenduar (e që nuk nënkupton largim nga puna, por ata kanë dhënë dorëheqje) dy drejtor në Eko-Higjienë, me arsyetimin e ditur për opinionin e gjerë, por ju sigurisht që jeni tërë javën në Prishtinë (përveç ditëve të “pazarit”) dhe nuk keni mundësi të informoheni me kohë, me zhvillimet e mira që po ndodhin në komunën tuaj.

Ju zoti Haziri një kohë të mirë e keni shfrytëzuar këtë kompani publike të Higjienës (ju e dini se si?, por edhe ne i dimë ngapak), hiq më pak nga ndikimet tuaja në spitalin regjional të Gjilanit, në postën e Kosovës, dhe në disa institucione tjera qendrore duke përfituar në forma të ndryshme, duke punësuar dhjetëra familjarë në vende të mira e joshëse, dhe së fundi ende po vazhdoni të ndikoni nëpër institucione qendrore, por që në rend të parë i shfrytëzoni në interes personal e “klanor”, e tek pastaj pak në interes të qytetarit të Gjilanit.

Rasti i fundit që vet e keni deklaruar nëpër media, se ju keni arritur të sjellni projekte nga Ministria në interes të qytetarëve të komunës, e që në realitet janë në interes së pari të familjes tuaj duke selektuar dhe përzgjedhur projektin për rregullimin dhe asfaltimin e rrugës që të dërgon tek shtëpia e juaj në Gjilan, dhe tjetrin projekt që ka të bëjë gjithashtu me asfaltimin e rrugës që të dërgon në fshatin tuaj të lindjes (për t’a vizituar më lehtë Llofcën pas ditës së “pazarit”).

Ne nuk jemi kundër sepse këto projekte janë bërë nga Komuna e Gjilanit dhe jo nga zyret e LDK-së, por po i theksoj këto gjëra për të ju kujtuar juve, që jeni prekur nga “skleroza” dhe për t’iu treguar qytetarëve të Gjilanit, se ju vazhdoni të jeni po i njëjti, i papërmirësuar, i dëmshëm dhe i rrezikshëm ende për komunën që po ëndërron ta udhëheqësh prapë t`i.

Por jo zoti Haziri! juve nuk do t’ua mundësojë asnjëherë qytetari i Gjilanit që të vendoseni në krye të kësaj komune, por ne si institucione komunale do të ju garantojmë juve dhe të “Ri-kthyerve” në degën tuaj të LDK-së, se pas përfundimit të projektit për ndërtimin e bibliotekës së qytetit, ne si komunë do të angazhohemi shumë seriozisht për ndërtimin e shtëpisë së pleqve, sepse do të jetë edhe në shërbimin tuaj, ku vetëm prej aty do të jeni më afër institucionit të Komunës, deri atëherë shëndet e suksese juve, e neve bashkë me qytetarët e Gjilanit të na prijë e mbara drejt rrugëve të suksesit tonë të përbashkët.

Autori është drejtor për Zhvillim Ekonomik