Skandali me Demarkacionin e zmbraps pushtetin

Analistët shohin mundësi të një kompromisi ndërmjet pozitës dhe opozitës për të shmangur gabimet e bëra nga Komisioni i ‘Murat Mehës’ .

Nevojitet Komision i ri shtetëror.

Analistët shohin mundësi të një kompromisi ndërmjet pozitës dhe opozitës për të shmangur gabimet e bëra nga Komisioni i ‘Murat Mehës’ .

Me kalimin e kohës dhe mungesën e guximit nga ana e Qeverisë së Kosovës, për ta dërguar për ratifikim në Kuvend Demarkacionin e kufirit me Malin e Zi, tani ka gjithnjë e më shumë zëra edhe nga pozita, të cilët ditët e fundit po e pranojnë haptas se me marrëveshjen e tanishme ka një devijim të madh te vijës kufitare të trashëguar nga shpërbërja e Jugosllavisë dhe humbje të territorit dhe pikave kontrolluese me interes strategjik edhe për sigurinë e Kosovës. Një atmosferë e tillë, sipas analistëve politikë, po krijon kushte për t’i thënë Jo të madhe kësaj marrëveshjeje nga legjislativi i vendit, pozita dhe opozita, por edhe për të kërkuar përgjegjësi nga Komisioni, që e ka pranuar këtë kompromis të dëmshëm për shtetin e Kosovës.

Ky ndryshim i madh i qëndrimeve edhe në radhët e pozitës, sipas analistëve politikë, po shihet si një afrim drejt kompromisit për të refuzuar marrëveshjen aktuale dhe krijimin e një Komisioni të ri, që në bashkëpunim me opozitën dhe ekspertët e pavarur edhe njëherë ta rishikonte procesin nga fillimi, për t’i dhënë vendit një shpresë të zgjidhjes së krizës. Konsensusi i afërt Eksperti i fushës së legjislacionit, Blerim Burjani, vlerëson se qëllimi i kundërshtimit të Demarkacionit të kufirit edhe nga radhët e pozitës, ka për ide jetësimin e ofertës për ta themeluar një komision gjithëpërfshirës në mes dy blloqeve politike, gjë që pozita është e gatshme që ta bëjë edhe një verifikim apo konfirmim të këtij Demarkacioni. “Tani është mirë që edhe zërat e disa njerëzve të pozitës paralajmërojnë nevojën e rishikimit të punës së kryer nga komisioni. Sidoqoftë, këto janë gjëra që tani po i thonë dhe kanë të bëjnë rreth një oferte për shtensionimin e situatës”, tha Burjani për “Kosova Sot”.

Politologu Arsim Haziri pohon se krijimi eventual i komisionit të ri, pas daljes së shumë zërave nga pozita që po e kundërshtojnë versionin e tanishëm, mund të konfirmojë pa asnjë problem faktin se kufiri i Kosovës me Malin e Zi gjithmonë ka qenë tek Çakorri ose tek Kulla e Zhlepit dhe duhet të rivendoset atje. “Konsideroj që shumica e deputetëve të koalicionit qeverisës e kanë ditur që me këtë marrëveshje Kosova humb territor, por kanë qenë të ndikuar nga partitë e tyre, prandaj edhe kanë heshtur deri më tash. Madje, disa prej deputetëve kanë dalë me ose pavetëdije haptas në mbështetje të kësaj vije kufitare të punuar nga Komisioni shtetëror për shënimin e vijës kufitare, të udhëhequr nga Murat Meha. Në vend se të kërkonin llogari nga ai, kur ekspertët tanë alarmonin që Kosova me këtë marrëveshje do të humbasë territore”, theksoi ai./kosova sot/