Skandali i radhës, edhe ‘Trepça’ viktimë e dialogut

Ja përse Qeveria e Kosovës po e zvarrit ligjin e premtuar. Për pasuritë kombëtare mund të diskutohet në Bruksel

Burime të gazetës thonë se fati i kombinatit metalurgjik, por edhe i Liqenit të Ujmanit, do të dihen pas bisedimeve me Serbinë. Qeveria po hesht, ndërsa deputetët e opozitës dyshojnë në prapaskenat e dialogut

Zvarritja e Ligjit të ‘Trepçës’ duket se nuk është e rastësishme. Burimet e gazetës që janë në rrjedha të ngjarjeve politike thonë se fati i kombinatit ‘Trepça’ dhe i Liqenit të Ujmanit do të dihet vetëm pas përfundimit të bisedimeve me palën serbe në Bruksel.

Qeveria e Kosovës në janar të këtij viti pati proceduar në Kuvendin e Kosovës plotësim ndryshimin e Ligjit për ndërmarrjet publike, ku parashihej transformimi i ‘Trepçës’ në ndërmarrje publike, por që ishin tërhequr nenet me të cilat ‘Trepça’ bëhej ndërmarrje publike, duke premtuar se statusin e këtij gjiganti metalurgjik do ta rregullojnë me strategji dhe ligj të veçantë. Deputetë që janë anëtarë të Komisionit për Tregti dhe Industri dhe të cilët e kanë diskutuar ligjin në fjalë thonë se për shkak të situatës aktuale politike dhe bllokadës së punës së institucioneve nga ana e opozitës Qeveria nuk do ta procedoj këtë vit strategjinë dhe projektligjin për gjigantin metalurgjik në Kuvendin e Kosovës, pavarësisht se në janar të këtij viti është premtuar se brenda pesë muajsh deputetët do ta kenë para vetes për ta shqyrtuar./kosova sot/