Fidanishtja

Skandali i pasaportave rrezik edhe për krizën e prodhimit të ri

/ 2 minuta lexim

Skandali i 1.4 milion eurove në Ministrinë e Punëve të Brendshme, përveç që ka dëmtuar imazhin e Kosovës para Bashkësisë ndërkombëtare, sigurisht se do të thellojë krizën në prodhimin e këtij dokumenti aq të rëndësishëm, dëme të cilat do të shkojnë në kurriz të qytetarëve të Kosovës.

Kështu kanë vlerësuar spektri politik opozitarë. Rexhep Selimi, anëtar i Komisionit për punë të brendshme dhe siguri në kuvendin e Kosovës dhe deputet nga Lëvizja Vetëvendosje, ka thënë për gazetën “Zëri”, se skandali në Ministrinë e rendit që drejtohet nga Bajram Rexhepi, padyshim që do të prodhojë edhe efektet e veta që drejtpërdrejt do të prekin edhe qytetarët e Kosovës.

“Ky skandal nuk do të mbështetet vetëm në suaza të nje skandali sikurse janë bërë rutinë të ndodhin në MPB, por gjithsesi është e pritshme që të prodhojë edhe efektet e vetat te pariparueshme, të cilat do të bien mbi kurrizin e qytetarëve të Kosovës”, ka thënë Selimi.

Në anën tjetër, kryetari i Komisionit për punë të brendshme dhe siguri, Ahmet Isufi, ka qenë i rezervuar në deklarimet e tij, duke thënë se komisioni që ai udhëheq do të përcjellë me vëmendje veprimet e MPB-së, rreth skandalit të 1.4 milion eurove, të cilat nuk kanë shkuar në destinacionin final, por kanë “humbur rrugën” duke shkuar në xhirollogari të nënkontraktueses, OeSD-së, Natalije Velija.

KKGJILAN

Ministri i Punëve të Brendshme, Bajram Rexhepi nuk ka dashur të komentojë se si do veprohet tash me prodhimin e pasaportave biometrike.

E nga ana e tij, Blerim Camaj, drejtor i Departamentit të Regjistrimeve dhe Gjendjes Civile ka thënë se Kosova edhe për periudhën 7 mujore është e furnizuar me pasaporta biometrike nga kompania austriake “Osterreichische Staatsdruckerei”, e cila në atë bote kishte fituar tenderin për prodhimin e këtij dokumenti.

Ai nuk ka dashur të flas për aferën korruptive në MPB, sikurse edhe nuk ka dashur të flasë për veprimet e ardhshme rreth prodhimit të pasaportave biometrike.