​Skandali i 600 mauneve, pastrim parash në Malin e Zi

Biznismeni Gani Veselaj, shkonte në Podgoricë, merrte paratë dhe më pas të njëjtat para, nëpërmjet kompanive të tija “Ngas” dhe “Shkoza”, i dërgonte në Mal të zi, se kinse kishte blerë 600 maune me naftë, të cilat nuk kishin hyrë asnjëherë fizikisht në territorin e Kosovës.

Në bazë të faturave dhe dokumenetave të lëshuara nga zyrtarë doganorë të Malit të Zi, rezultonte se 600 maune naftë kishin hyrë në Kosovë, por realisht të njëjtat nuk e kishin kaluar territorin e Malit të Zi.

“ Gani Veselaj ka regjistruar dy kompanitë në ARB, duke u munduar të bëjë diçka, thjesht për t’i pasur për këtë punë. Tashmë, në këtë çështje dyshohet se janë përfshirë edhe zyrtarë doganorë nga Mali I zi, të cilët kanë hartuar dokumentacionin. Kështu që do të njoftohet Prokuroria e Malit të Zi, që të ndjekë çështjen në territorin e saj”, ka thënë një burim pjesë e grupit hetimor.

Gazeta “Kosova Sot” ka mësuar se Gani Veslaj ka biznese në Mal të Zi. Ai posedonte me hipotekë një sipërfaqe toke prej 1000 ari në Ulqin, si dhe një shtëpi të vogël pushimesh. Të dyja këto prona janë të bllokuara, së bashku me një pompë në Pejë.