S’ka zgjedhje pa i kryer obligimet ndërkombëtare
RajoniPress
10:31, 31 Janar, 2016
Analistët në vend thonë se nuk mund të ketë zgjedhje, pa u trajtuar disa çështje më rëndësi në Kuvendin e Kosovës.Për disa tema, madje është i domosdoshëm koalicioni i madh thonë ata.
Ratifikimi i marrëveshjes mes Kosovës dhe Holandës për Gjykatën Speciale, demarkacioni me Malin e Zi, pastaj kompletimi i bordit të Organit Shqyrtues të Prokurimit shihen nga analistët si tema të cilat duhet të trajtohen me urgjencë në Kuvendin e Kosovës. Albert Krasniqi nga Instituti Demokratik i Kosovës, thotë se pa u trajtuar këto tema nuk mund të shkohet në zgjedhje.
“Pasi të kalojnë këto çështje, pse jo, mund të konsiderohet mundësia e mbajtjes së zgjedhjeve. Por, kjo duhet të vijë në bazë të një pajtueshmërie të dyanshme dhe jo që në mënyrë të njëanshme të shkohet në zgjedhje për shkak se do të kishte destabilitet më të madh dhe zgjedhjet nuk do të mund të mbaheshin në frymë të mirë dhe në bazë të praktikave më të mira për zgjedhjet”, ka theksuar Albert Krasniqi për RTK Radio.
Në kuptimin politik, prishja e koalicionit qeverisës dhe futja në zgjedhje të parakohshme, nuk është hap i mençur për Kosovën. Kështu konsideron analisti Afrim Hoti.
Ai mbron idenë që në këto rrethana, Kosova do të tregohej më e pjekur politikisht nëse do të krijonte një qeveri transitore e cila edhe do të caktonte datën e zgjedhjeve por edhe do të kryente obligimet ndërkombëtare që ka vendi.
“Nëse do të kishim rastin që të formohej një koalicion qeverisës që do të udhëhiqte vendin drejt zgjedhjeve ( një koalicion i përkohshëm) që eventualisht do të mbaheshin kah vjeshta, atëherë,mendoj se të gjitha partitë politike duhet të ishin koshiente dhe të vetëdijshme për vendimet juridike dhe ndërkombëtare që ka Kosova”, është shprehur Afrim Hoti për RTK Radio.
Ndryshe subjektet politike tashmë kanë nisur të dalin në terren dhe të mbajnë tubime me qytetarë.
Pavarësisht se krerët e subjekteve politike nuk i konsiderojnë fushatë paraelektorale, megjithatë, sipas analistëve takime të tilla tregojnë se subjektet janë duke u përgatitur për zgjedhje të parakohshme.
