S’ka licenca për mësimdhënësit e dalë nga programe…

Ministria e Arsimit, Shkencës dhe Teknologjisë (MAShT) do t’i licencojë vetëm ata mësimdhënës që para vitit 2011 i kanë kryer studimet në programe të bartësve privatë të arsimit të lartë, në programe që kanë qenë të licencuara për mësimdhënie nga ministria, shkruan sot Koha Ditore.

Të tjerët që studimet i kanë përfunduar në programe që nuk kanë qenë të licencuara si programe të mësimdhënies, por të fushave të tjera, nuk do të kenë mundësinë të punojnë në sistemin e arsimit publik të Kosovës.

MAShT-i gjatë nëntorit të këtij viti pritet ta nxjerrë një udhëzim administrativ, me anë të të cilit pritet të licencohen mësimdhënësit që kanë përfunduar studimet në programe që kanë qenë të licencuara, përcjell koha.net.

Ofrimi i programeve për mësimdhënie në bartësit privatë të arsimit të lartë është i ndaluar me Ligjin për arsimin e lartë të miratuar në vitin 2011. Me këtë ligj është e përcaktuar që vetëm bartësit publikë të arsimit të lartë mund të kualifikojnë mësimdhënës.