S’ka ftesë nga Merkel për Mustafën

Angela Merkel asnjëherë nuk i ka dërguar ftesë zyrtare Kryeministrit të Kosovës, Isa Mustafa. Megjithëse po punohet që ky takim mes tyre të futet në agjendën e tij, për vizitën që do ketë ai në qershor në Berlin. Këtë e konfirmoi Valon Murtezaj, këshilltari për Punë të Jashtme i Kryeministrit Mustafa.

“Një nga vizitat do të jetë edhe vizita në Berlin. Mirëpo, më duhet të konfirmoj për hir të korrektësisë se ende ftesa zyrtare nuk ka mbërritur në Zyrën e Kryeministrit, sado që palët janë duke punuar që kjo të realizohet”, tha Murtezaj për RTK.

Që nga letra kur Merkel i ka dërguar Mustafës për t’i uruar marrjen e detyrës, sipas Murtezajt, kanë lënë të kuptohet se ajo do e takojë së shpejti Mustafën.

“Që me marrjen e detyrës në telegramin, apo letrën e urimit që Znj. Merkel i ka bërë Kryeministrit, ka lënë të nënkuptohet që jeni i ftuar apo do të ju takoj së shpejti në Berlin”, ka thënë Murtezaj.