Sindikata po na “plaçkit”

Gjilan – Ukshin Hajdini ish punëtor në “Morava e Binqës” me një përvojë mbi 30 vjeçare tha për rajonipress se sindikata e punëtorëve në Prishtinë dhe Gjilan në vend se t`i përkrahë punëtorët ajo po i plaçkit duke ua marrë edhe djersën e punës. Ai thotë se ende nuk i kanë marrë mjetet e premtuara të 20 %. Por ndryshe mendon Aziz Azizi kryetar i Sindikatave të rajonit të Anamoravës.

Ukshin Hajdini është njëri nga ish punëtorët e shumtë që bredhë rrugëve dhe pret ndonjë lajm të mirë për të marrë pjesën që i takon në 20 % e shpërndarë gjatë shitjes së gjigantit “Morava e Binqës”.

Por, Ukshin Hajdini është i revoltuar me vonesën e tepërt rreth këtij procesi. “Jemi njerëz familjar dhe nuk posedojmë kurrfarë të ardhurash. Ne tani është dashur të marrim pjesën më të madhe të 20% e në fakt nuk i kemi marr as 70% të kësaj shume” shprehet Hajdini.

Hajdini tha për rajonipress se në tërë këtë vonesë qëndron problemi tek Sindikata e Gjilanit dhe ajo e Prishtinës. ”Sindikata në vend që të na ndihmojë ajo qëllimisht po na hynë në hak dhe po i vonon mjetet e dedikuara për ish punëtorët. Sindikata në vend se të na përkrah për të përshpejtuar procesin ajo po e përkrah kryesinë e Sindikatës në Prishtinë” tha Hajdini.

Hajdini tha se për këtë vonesë të mos pagesës së mjeteve e kanë informuar edhe Kuvendin e Kosovës, AKP, Avokatin e Popullit, BSPK dhe Ambasadën Amerikane në Prishtinë.

Por ndryshe mendon Aziz Azizi kryetar i Sindikatave të rajonit të Anamoravës. Azizi tha për rajonipress se me të gjitha mjetet dhe mundësit juridike i ka mbrojtur të gjithë punëtorët e Anamoravës, madje edhe ata që nuk kanë qenë fare në Sindikatë. “Rasti i Moravës së Binqës ende ndodhet me ankesë në Dhomën e Posaçme dhe asnjë pagesë nuk mund të bëhet derisa nuk merret një vendim u formës së prerë” ka sqaruar Azizi./rajonipress/