Mësimdhënësit ishin trajtuar nga Ministria e Shëndetësisë si kategori me prioritet për vaksinim, në mënyrë që të mos ketë pengesa në procesin mësimor, por deri më tani vetëm 7 mijë e 200 mësimdhënës janë vaksinuar, derisa numri i përgjithshëm i personelit arsimor në nivel vendi është 24 mijë e 370.
Nga Sindikata e Bashkuar e Arsimit Shkencës e Teknologjisë u kanë bërë thirrje të gjithë punëtorëve të arsimit që të marrin vaksinat anti-COVID.
Ymer Ymeri nga SBASHK-u, ka thënë se është shqetësues fakti se vetëm një numër i vogël i personelit arsimor janë imunizuar.
“Edhe për neve si SBASHK është shqetësues ky vaksinim i vogël i punëtorëve arsimor, për shkak se është krijuar mundësia që të gjithë të vaksinohen, edhe mos-vaksinimi mund të shkaktojë mos-fillimin e procesit mësimor në shkolla pa kufizime”, tha Ymeri për RTV 21.
Prandaj, ai tha se u bëjnë apel mësimdhënësve që të vaksinohen.
“Ju bëjmë apel të gjithë punëtorëve arsimor, por në veçanti mësimdhënësve të vaksinohen, për shkak se ka kohë të merret edhe doza e parë edhe e dyta para se të fillojë viti shkollor”, u shpreh Ymeri.
Ndryshe, zëvendësministri i Arsimit, Shkencës, Teknologjisë dhe Inovacionit, Dukagjin Pupovci, ka thënë se tashmë kanë hartuar draft kalendarin për fillimin e vitit të ri shkollor, duke shtuar se këtë vit do të përdoren tekstet alternative.
Këto deklarata, Pupovci i bëri gjatë një adresimi për media.
“Regjistrimi i nxënësve në shkolla të dhjeta ka përfunduar dhe afati i dytë mbyllet me 23 gusht. Qeveria ka ndarë buxhetin për tekste shkollore. Në këtë vit do të përdoren tekste alternative. Gjithashtu do të shpallet lista e teksteve shkollore. Testi i arritshëmërisë në Kamenicë do të mbahet me 3 gusht”, u shpreh Pupovci.
Pupovci gjithashtu tha se pret që të gjithë mësimdhënësit të vaksinohen.
“Nuk ekziston ligj që e obligon dikë të vaksinohet. Ftoj mësimdhënësit të vaksinohen në mënyrë që të bëjnë të mundur fillimin e vitit të ri shkollor”.
Ai ka sqaruar se ka filluar aplikimi për studimet bachelor dhe master, teksa ka paralajmëruar lehtësime për studimet e doktoratës.
