Sinani thellon bashkëpunimin me Luginën e Preshevës

Kamenicë – Bashkëpunimi mes Komunës së Kamenicës dhe Kosovës Lindore, përkatësisht Preshevës, Medvegjës dhe Bujanocit, ishin temë diskutimi mes kryetarit të Kamenicës, Begzad Sinani dhe përfaqësuesve të Luginës së Preshevës.

Në këtë takim, u tha se Kamenica do të bashkërendojë aktivitetet me Luginën, duke marrë parasysh që komuna jonë kufizohet me pjesën e saj.

Në këtë mënyrë, u premtua se do të krijohen mundësi më të mira për lëvizjen e njerëzve dhe mallrave. Në takim, ishte edhe Kryetari i Këshillit Kombëtar të Shqiptarëve në Luginën e Preshevës, Galip Beqiri si dhe ish kryetari i Bujanocit, Shaip Kamberi, raporton rajonipress.

Sinani e ka çmuar vizitën e liderëve të Luginës dhe ka thënë se lidhjet vëllazërore dhe zhvillimi ekonomik e kulturor me komunat e Luginës do të jenë prioritet i tij dhe i qeverisjes komunale.

“Ne kemi shumë arsye që të jemi bashkë në fesat e zhvillime tjera politike, kulturore, ekonomike e informuese. Lugina do të jetë e pranishme në fushën tonë dhe me të gjitha mundësit ne do të jemi në dispozicionin tuaj” ka shtuar Sinani./rajonipress/