Sinani i hap dyert për shoqërinë civile

Kamenicë – Në kuadër të projektit ”Përmirësimi i qeverisjes së mirë përmes monitorimit dhe avokimit”, të financuar nga Ambasada e Shteteve të Bashkuara të Amerikës (SHBA) , drejtoresha ekzekutive e OJQ-së Network of Peace Movement “NOPM”, Besime Tusha ka nënshkruar marrëveshjen për mirëkuptim me Kryetarin e Komunës së Kamenicës, Begzad Sinani.

Drejtoresha Ekzekutive, Besime Tusha, gjatë takimit me kryetarin Sinani e ka njoftuar shkurtimisht me aktivitetet dhe ecurinë e projektit. Stafi i OJQ-së, “NOPM” do të monitorojnë mbledhjet e Kuvendit Komunal dhe Komitetin për Politikë dhe Financa, Komitetin për Komunitete si dhe do të monitoroj drejtoritë përkatëse në komunë.

Kryetari Sinani tha se me realizimin e këtij projekti komuna e Kamenicës do të jetë përfitues kryesor pasi që na ndihmon në ngritjen e transparencës, dyert e komunës kanë qenë gjithmonë të hapura për shoqërinë civile dhe presim edhe në të ardhmen bashkëpunim sa më të mirë .“Ju jeni ata të cilët përmes projekteve dhe aktiviteteve transmetoni punën e administratës komunale tek qytetarët, pikërisht për këtë lloj projekti ka pasur nevojë komuna jonë” është shprehur Sinani.

Kryetari i komunës së Kamenicës, Begzad Sinani ka siguruar se do t’i përmbush obligimet e veta që dalin nga kjo marrëveshje duke synuar kështu një bashkëpunim edhe më të mirë dhe më të shëndosh në të ardhmen me shoqërinë civile në Kamenicë, rritja e transparencës përmes pjesëmarrjes në vendim marrje nga ana e qytetarëve do të jetë një stimulim shtesë për ne në punën e administratës komunale.

Këtë projekt e ka mbështetur dhe financuar Ambasada e Shteteve të Bashkuara të Amerikës (SHBA) në kuadër të Programit të Granteve të Vogla të Komisionit për Demokraci./rajonipress/