Sinani dhe Goforth dakordohen për bashkëpunim të mëtejm

Kamenicë – Kryetari i Komunës së Kamenicës Begzad Sinani dhe nënkryetari Fatmir Matoshi, kanë pritur në takim njohës udhëheqësin e ri të Njësisë së Monitorimit dhe Ndërlidhjes së KFOR-it Amerikan Kapitenin Goforth. “I jemi falënderues KFOR-it Amerikan që nga viti 1999, ky nuk është një falënderim protokollar, por është shumë i përzemërt dhe miqësor dhe është falënderim të cilin e përcjell në emër të gjithë banorëve të Kamenicës. Problemet më të mëdha që i kemi pasur, mbështetjen e kemi gjetur tek KFOR- i Amerikan” ka thënë Sinani duke e falënderuar për kontributin e tij Togerin Gavin McGarry, i cili e përfundoi mandatin dhe duke i uruar mirëseardhjen Kapitenit Goforth.

Sinani ka siguruar KFOR-in Amerikan se bashkëpunimi edhe me ekipin e ri nuk do të mungojë dhe se kabineti i Kryetarit Sinani do të jetë i gatshëm të përgjigjet gjithherë në kërkesat e KFOR-it Amerikan.

Kapiteni Goforth është shprehur i kënaqur që ndodhet në Kamenicë dhe që ka gatishmërinë e plotë të komunës për bashkëpunim. Ndërsa Togeri Mc Garry ka falënderuar Sinanin dhe Matoshin për bashkëpunimin e deritashëm duke besuar se i njëjti bashkëpunim do të vazhdojë edhe me përfaqësuesit e ekipit të ri.

Në takim u fol për projektet aktuale në Kamenicë, për raportet ndëretnike dhe për planet në të ardhmen./rajonipress/