Sinani beson në KFOR-in dhe Policinë e Kosovës, por shqetësohet për brezin kufitar

Gjilan – Begzad Sinani kryetar i Kamenicës thotë për rajonipress se ka besim të plotë në KFOR-in amerikan dhe Policinë e Kosovës sa i përket ruajtjes së vijës kufitare, por thotë se është i shqetësuar edhe me ankesat e banorëve të Karaqevës.

Kreu i Kamenicës Begzad Sinani nuk e ndien vetën mirë kur pas 14 vitesh ende përmendet si problem i pazgjidhur kufitar vija administrative në Karaqevë të Epërme, raporton rajonipress.

Provokimi i fundi i xhandarmërisë serbe i cili alarmoj krejt brezin kufitarë e ka shqetësuar të parin e Kamenicës edhe pse thotë se ka besim të plotë tek organet e sigurisë.”Unë jam në kontakte të përhershme me KFOR-in dhe Policinë e Kosovës dhe kam besim të plotë se ata do të dinë ta menaxhojnë vijën kufitare. Unë menjëherë pas këtyre provokimeve kam kërkuar shtimë të forcave të sigurisë dhe jam i sigurt se kjo do të ndodhë. Normalisht që i kuptojë edhe shqetësimet e banorëve dhe ankesat e tyre” tha Sinani.

Sinani tha se problemi i Karaqevës po neglizhohet edhe pse ai dhe ish pushteti komunal e kanë sensibilizuar mjaft problemin, por askush nuk ka reaguar.”Edhe Parlamenti, edhe Qeveria janë të njoftuar me problemin e Karaqevës. Aty nuk po cenohet kufiri i Kamenicës, por po atakohet Kosova” thotë Sinani.

Sinani tha se përpjekjet e tij dhe të institucioneve komunale për ta zgjidhur problemin e vijës kufitare me Serbinë nuk do të mungojnë.”Unë do të kërkojë nga Edita Tahiri që në takimet me palën serbe ta diskutojë edhe kontestin kufitarë të Karaqevës. Është e pafalshme që pas kaq vitesh ende kemi probleme të pa definuara me Serbinë” tha Sinani./rajonipress/