Si të lëvizin luginasit të cilët nuk kanë letërnjoftime, cili është numri i tyre personal?

Gjilan – 21 vjet më parë një numër i madh i luginasve u dëbuan me dhunë nga shtëpitë e tyre dhe u vendosën në Kosovë, pasiqë regjimi kriminal serb ua bëri të pamundshme jetën e tyre në trojet e veta. Këta qytetarë u vendosën në Kosovë ku edhe filluan jetën e tyre nga e para ka shkruar Kushtrim Kadriu.

Pos problemeve të mëdha ekonomike ata u përballën edhe me një problem edhe më të madh e banal siç mos pajisja me dokumente identifikimi. Ky problem, tash e sa vite nuk po gjen zgjidhje. U janë dhënë disa letërnjoftime të përkohshme, por kjo nuk ka sjellur ndonjë zgjidhje të kënaqshme, edhe pse me insistimin e ish- zv ministrit të brendshëm z. Izmi Zeka është krijuar baza ligjore.

Tani në kohë pandemie është telashe e madhe mungesa e dokumenteve të identifikimit për këta banorë, pasiqë lëvizja e qytetarëve me rregullat e reja të qeverisë bëhet me dokumente identifikimi, përkatësisht me numër personal. Shumë prej tyre nuk kanë fare letërnjoftim as të Kosovës e as të Serbisë, apo ndonjëri prej tyre mund të ketë ndonjë dokument me afat të skaduar. Kërkojmë nga qeveria që të ndërmarrë hapa të shpejtë në krijimin e një mundësie ligjore që edhe këta qytetarë të kenë një kohë kur mund të dalin për nevojat e tyre të përditshme, përndryshe ky penalizim atyre do t’ua vështirësojë edhe më tepër jetët e tyre ka thënë Kushtrim Kadriu, kryetar i Lëvizjes ”Vatra”./rajonipress/