Si ndikon uthulla e mollës në organizëm?

Uthulla e mollës, dikur thjesht një përbërës i zakonshëm në sallata, sot po përmendet gjithnjë e më shumë si një ndihmës natyral për rënien në peshë dhe përmirësimin e shëndetit.

Gjithçka ka nisur pasi shumë njerëz, përfshirë edhe personazhe të njohur në rrjetet sociale, kanë treguar eksperiencat e tyre pozitive me përdorimin e saj. Por sa të vërteta janë këto pretendime?

Çfarë thotë shkenca?

Megjithëse kërkimet janë ende të kufizuara, disa studime sugjerojnë se uthulla e mollës mund të ndihmojë në menaxhimin e peshës. Një studim japonez i vitit 2009 tregoi se personat obezë që konsumuan 1-2 lugë uthull molle në ditë për 12 javë humbën mesatarisht dy deri në katër kilogramë dhe përmirësuan nivelet e yndyrnave në gjak.

Gjithashtu, një studim i botuar në revistën “Diabetes Care” vuri re përmirësim të ndjeshëm të ndjeshmërisë ndaj insulinës tek personat me diabet të tipit 2 pas konsumimit të uthullës së mollës para vakteve.

Si ndikon uthulla e mollës në organizëm?

Efekti kryesor lidhet me acidin acetic, përbërësin aktiv të uthullës, i cili ngadalëson zbërthimin e karbohidrateve dhe stabilizon nivelin e sheqerit në gjak. Kjo jo vetëm që ndihmon në shmangien e rritjeve të papritura të glukozës, por gjithashtu ndihmon në ndjesinë e ngopjes, duke reduktuar dëshirën për të ngrënë ndërmjet vakteve.

Acidi acetik gjithashtu mund të përshpejtojë metabolizmin dhe të ulë depozitimin e yndyrës, dy faktorë kyç për menaxhimin afatgjatë të peshës.

Si ta konsumoni në mënyrë të sigurt?

Ekspertët këshillojnë që uthulla e mollës të mos konsumohet e pastër, pasi mund të dëmtojë smaltin e dhëmbëve dhe të irritojë stomakun. Doza ideale është një lugë gjelle e tretur në një gotë ujë të ngrohtë, rreth 20 minuta para mëngjesit. Me kalimin e kohës, mund të shtohet edhe para vakteve të tjera, nëse organizmi e toleron mirë.

Jo të gjitha uthullat e mollës janë njësoj të mira për shëndetin. Për të marrë përfitimet më të mira, zgjidhni gjithmonë uthull molle që është e papërpunuar dhe e pafiltruar, sepse përmban një shtresë të turbullt natyrale që përmban baktere të mira dhe antioksidantë natyralë. Kjo shtresë është pjesë e procesit të fermentimit dhe ndihmon në tretje dhe përmirësimin e shëndetit të stomakut.

Kujdes në disa raste

Uthulla e mollës nuk rekomandohet për persona me probleme si refluksi acid, gastrit apo ulçera. Gjithashtu, nëse përdorni medikamente për diabet apo sëmundje renale, konsultimi me mjekun është i domosdoshëm.

A është zgjidhja magjike për peshën?

Jo krejtësisht. Uthulla e mollës nuk do t’ju japë lejen për të ngrënë ç’të doni pa pasoja. Humbja e peshës kërkon ende një balancë mes ushqyerjes së shëndetshme, aktivitetit fizik, gjumit cilësor dhe menaxhimit të stresit. Por si një shtesë e lirë dhe e lehtë në rutinën tuaj uthulla e mollës mund të japë kontributin e vet në rrugën drejt formës ideale.