Si ndikojnë llojet e qepëve në shëndetin tuaj?

Qepa i takon Allium-it nga familja e zambakut e në të afërmet e saj përfshihen hudhra, preshi, si dhe të gjitha llojet dhe nënllojet e qepës.

Qepa e re

Qepa e re është e pasur me vitamina C dhe K, që janë të nevojshme për zhvillim normal të eshtrave. Vitamina C ndihmon në sintezën e kolagjenit që i bën eshtrat të fortë dhe e rrit dobinë e kalciumit nga ushqimi, derisa vitamina K luan rol të rëndësishëm në mbajtjen e dendësisë së tyre. Në qepën e re gjithashtu ka vitaminë A, e cila është e nevojshme për organizmin për ruajtje të shëndetit të syve. Është zbuluar që qepa e re mbron sytë nga infektimet. Qepa e re është e pasur me kombinimin sulfurik të alil sulfidit, që redukton rrezikun nga kanceri i zorrës së trashë.

Preshi

Përmban sasi të dukshme të bioflavonoidit kempferol, që është treguar si mbrojtës i mirë kundër dëmtimeve të enëve të gjakut, duke përfshirë edhe ato nga ana e oksigjenit reaktiv. Edhe pse shpesh e shpërfillur, përqindja e acidit folik në presh luan rol të rëndësishëm në ruajtjen e shëndetit. Acidi folik është vitaminë e rëndësishme e grupit B, që mbështet sistemin kardiovaskular, duke e ekuilibruar përqindjen e homocisteinave në organizëm. Në presh është e pranishme edhe një sasi e madhe e polifenoleve. Polifenoli mbron enët dhe qelizat e gjakut nga oksidimi dëmtues.

Qepa e kuqe

Ngjashëm me preshin, qepa e kuqe është përgjegjëse për shëndetin kardiovaskular, por gjithashtu është e rëndësishme në parandalimin e kancerit. Ekstrakti i qepës së kuqe, i pasur me shumë sulfide parandalon rritjen dhe zhvillimin e qelizave të tumoreve. Qepa e kuqe është një mjet i shkëlqyeshëm natyral antibakterial. Me konsumim të ushqimeve të pasuruara me qepë të kuqe, është e mundur që ta forconi imunitetin, që do të thotë se këtë sezon do ta kaloni pa ftohje dhe grip, e është edhe më efikase në parandalimin e sëmundjeve bakteriale. Një studim nga viti 2009 ka zbuluar se personat, që konsumojnë rregullisht qepë të kuqe kanë eshtra më të fortë. Te personat e moshuar që hanë qepë të kuqe rreziku për thyerje të ijës është për 20 për qind më i ulët. Arsye për këtë, thonë shkencëtarët, është kuercetina dhe antioksiduesit e tjerë në qepë.

Qepa djegëse

Qepa djegëse ka më shumë vlera ushqyese sesa llojet e tjera. Ka më shumë antioksidues, minerale dhe vitamina sesa qepa e zakontë. Përmban vitaminë A, që shërben si antioksidues i fortë gjatë mbrojtjes së organizmit nga kanceri mushkërive, i fytit dhe gojës. Përveç vitaminës A, përmban edhe shumë minerale dhe elektrolite si hekuri, kalciumi, bakri, kaliumi dhe fosfori.

Hudhra

Hudhra është burim i pasur me krom, mineral ky që u ndihmon qelizave që në mënyrë të duhur të reagojnë në nivelin e insulinës në gjak. Në atë proces hudhra e rregullon veprimin e insulinës, përkatësisht nivelin e sheqerit në gjak te njerëzit që vuajnë nga diabeti. Sasia e vitaminës C dhe manganit në hudhër ndihmon në trajtimin e ftohjes dhe gripit me veprim kundër inflamacionit. Piridoksina dhe vitamina B në anën tjetër luftojnë kundër gjendjeve nevrotike.

(Kosova Sot)